Kuni kecha, 1 iyun' kuni Termiz shahridagi Imom Termiziy o'rta maxsus islom ta'lim muassasasiga O'zbekiston musulmonlari idorasi raisi, muftiy Usmonxon Alimov hazratlari tashrif buyurdilar. Surxondaryo viloyati bosh imom-xatibi Aliakbar domla Sayfuddinov, Diniy idora Ish boshqaruvchisi Rustam Jamilov, Imom Termiziy o'rta maxsus islom ta'lim muassasasi direktori Shukrullo Umarov hamrohlik qildi.
Tashrif davomida muftiy hazratlari ta'lim muassasasi faoliyati bilan yaqindan tanishib, ta'lim muassasasi pedagog-o'qituvchilari, xodimlar hamda talabalarbilan mazmunli suhbat o'tkazdilar.
Suhbat davomida muftiy hazratlari ta'lim muassasasida olib borilayotgan ishlarni ijobiy baholab, istiqboldagi faoliyati borasida o'zlarining muhim ko'rsatmalar berdilar.
Muhtaram Prezidentimiz tashabbuslari bilan Termiz shahrida xalqaro ilmiy tadqiqot markazi hamda ta'lim muassasasi tashkil etilishi bejizga emasligini ta'kidlab, bu ilm maskanlaridan buyuk termiziy allomalar kabi etuk ulamolar davomchilari etishib chiqishiga ishonch bildirdilar.
Talabalarning ta'lim salohiyatini oshirish hamda ularni kelajakda hadis va shariat ilmlarini puxta o'zlashtirib, etuk mutaxassis bo'lib etishishlari bo'yicha quyidagi tavsiyalarini berib o'tdilar:
Ta'lim muassasasi talabalariga Toshkent islom institutidan hadis ilmi, arab tili va muhovara hamda Qur'oni karim va tajvid fanlaridan dars berish uchun etuk mutaxassislarni jalb etish;
Ta'lim muassasasida yangi fan sifatida Imom Termiziyning “Sunani Termiziy” asarini o'qitilish rejalashtirilgani bois, talabalar uchun “Imom Termiziy kursisi”ni joriy etish;
“Sunani Termiziy” asarini xatm qilib, hadis ilmi mutaxasssisi darajasiga etgan talabalarga “Imom Termiziy kursisi”da hadis ilmi bo'yicha ijoza olishlarini yo'lga qo'yish;
Ta'lim muassasasida ustoz-shogird an'anasini takomillashtirish;
Ta'lim muassasasining kutubxona fondini boyitib borish;
Talabalarga hanafiy mazhabi va moturidiya aqidasi asosida sof islom e'tiqodini singdirib borish.
Suhbat yakunida muftiy hazratlari ta'lim muassasasi pedagog-xodimlari tomonidan olib borilayotgan ishlarga muvaffaqiyatlar tilab, duo qildilar.

Shukrullo UMAROV,
Imom Termiziy o'rta maxsus islom ta'lim muassasasi direktori