Aqidaparastlik g'oyalaridan ehtiyot bo'ling
Natijada diyorimizda din niqobi ostidagi ekstremistik, aqidaparastlar mavjud konstitutsion tuzumga qarshi borib hokimiyatni egallash va O'zbekistonda Islom davlati qurish, xalqni qo'rquvga solib, hukumatga nisbatan ishonchsizlik hissini uyg'otish uchun turli jinoyatlar va terrorchilik harakatlari sodir etish yo'li bilan el tinchligini buzishga urindilar. Ularning asl maqsadi hukumatparastlik, ya'ni davlatni qo'lga olishdan iborat edi. Bunga hukumatimiz tomonidan o'z vaqtida zarba berildi va ularning payi qirqildi. Lekin, bu buzg'unchi oqimlar tag-tomiri bilan tugatildi, degani emasdir. Ular yana turli ko'rinishlarda va boshqa oqimlar shaklida namoyon bo'la boshladilar. Ular soddadil xalqimizni, ayniqsa, yoshlarni o'zlariga og'dirib olishga harakat qilishmoqda.
Fuqarolarimiz bunday buzg'unchi oqimlarning kelib chiqishi tarixi, ularning g'oyaviy maqsadlari haqida yaxshi bilishlari va ularning g'arazli g'oyalariga aldanib qolmasliklari lozim.
Ushbu g'oyalar Islom diniga, xususan, Hanafiy mazhabiga zid ekanligini shundan ham bilsa bo'ladiki, ular qabr azobini inkor etadilar. Sarvari olam Muhammad sallollohu alayhi vasallamning afzal inson ekanliklarini tan olmaydilar. Eng dahshatlisi shundaki, ular ham diniy, ham dunyoviy axloq normalariga xilof bo'lgan, dinimiz tomonidan harom qilingan, qonun tomonidan ta'qiqlangan behayo suratlar (pornografiya)ni yoqlab, keng tashviqot qilib, bunday fahsh suratlarni tomosha qilishga katta imkoniyatlar yaratib beradi. “Hizb ut-tahrir”diniy siyosi oqimi Qur'oni karimning “Niso” surasidagi qo'yidagi oyat, ya'ni:
“Ey mo'minlar, Allohga itoat qilingiz va payg'ambarga hamda o'zlaringizdan (ya'ni, musulmon) hokimlarga bo'ysuningiz!” oyatidagi “...o'zlaringizdan bo'lgan hokimlarga bo'ysuningiz!” degan joyi tushirib qoldirilib, hattoki Qur'oni karim oyatlari ham soxtalashtiriladi.
Shu kunlarda diniy jabhada ro'y berayotgan muammolar ana shu oqimlar tufayli sodir bo'lmoqda. Ular alamzadalik bilan turli ig'volarni tarqatmoqdalar. Halq o'rtasiga nifoq solishga harakat qilmoqdalar, shuning uchun ham ularning kirdikorlarini fosh etishimiz hamda keskin zarba berishimiz darkor. Biz mo'min-musulmonlar shuni yaxshi anglamog'imiz lozimki, Islom dini niqobi ostida tuzilgan har qanday harakat, oqim va firqalar muqaddas dinimiz uchun yotdir. Chunki, hayot yo'limizni aniq ko'rsatib bergan Qur'oni karim va Sunnati nabaviyadek asosiy qo'llanmamiz bor. Bu borada Payg'ambarimiz Muhammadsallollohu alayhi vasallam shunday marhamat qilganlar:
“Ey ummatlarim, men sizlarga ikki narsani qoldirib ketyapman. Biri Alloh taoloning kitobi – Qur'oni karim, ikkinchisi esa mening sunnatim - hadislar. Agar sizlar ana shu ikki narsaga amal qilgan holda hayot kechirsangiz hech qachon adashmaysizlar va ikki dunyo soadatiga erishursizlar”.
Shu kunlarda mustaqil mamlakatimiz fuqarolari ijtimoiy taraqqiyot, muhim o'zgarishlar, olamshumul tarixiy voqealar og'ushida hayot kechirmoqdalar. Hozirga zamon talabi har bir fuqaroni, jumladan, din ahlini ham ijtimoiy hayotda faol bo'lib, turli voqea-hodisalardan boxabar bo'lib turishlarini taqazo etmoqda, ular jamiyatimizda ro'y berayotgan voqea-hodisotlarga teran ko'z bilan nazar tashlab, dinimiz va Vatanimizning daxlsizligiga rahna soladigan qora kuchlarga qarshi murosasiz kurash olib bormoqliklari, ayniqsa, turli buzg'unchi oqimlar, aqidaparastlik, ekstremizm kabi qabih niyatli kishilarning puch g'oyalari, g'arazli maqsadlarini fosh etmoqliklari lozim.
Mustaqil mamlakatimizda Islom dini omilidan, uning boy ma'naviy va madaniy qadriyat sifatidagi katta imkoniyatlaridan unumli foydalanish maqsadida ulkan ishlar amalga oshirilmoqda. Dinimizga berilgan emin-erkinlik, masjid-madrasalarning obod qiinishi, buyuk allamolarimizning tavallud sanalari nishonlanishi, ularning xarobaga aylanib qolgan abadiy qo'nim tongan maskanlari muqaddas ziyoratgohlarga aylantirilishi xalqimiz va hukumatimizning Islom diniga bo'lgan mehr-muhabbati, hurmat-ehtiromining yaqqol tasdig'idir. Shu o'rinda muhtaram Yurtboshimizning qo'yidagi so'zlarini eslab o'tish joizdir:
“Biz dinga bundan buyon ham barcha shart-sharoitlarni yaratib beramiz. Diniy rasm-rusumlarga, bayramlarga, diniy tarbiya va ta'limga doimo jiddiy e'tibor beriladi. Ayni zamonda biz din peshvolariga, o'zimizga o'xshagan musulmon birodarlarimizga bir narsani takror va takror o'qtirmoqchimizki, din o'z yo'li bilan, davlat o'z yo'li bilan. Diniy partiyalar tuzib, hokimiyat talashib yurishlar Hudoga ham xush kelmaydi. Islom dini insonlarni kamtarlikka, kamsuqumlikka undaydi. Musulmon farzandi kechirimli bo'ladi. Musulmon farzandi birovni kofir, birovni xudojo'y deb toifalarga ajratmaydi. Sababi, bandasining ustidan bandasi emas, Hudoning O'zi hukm chiqaradi.
Shunday ekan, bir-birimizni behuda ayblab, men musulmonman, sen kofir deb talashib yurishlar bizga to'g'ri kelmaydi. Hamma ahil, hamma pokiza bo'lib yashasin. Kimning fazilati qancha ekanini Yaratganning O'zi ajrim qilib beradi u dunyoda”.
Alloh taolo insonga aql-zakovat berib unga ruhiy, ilohiy kuch ato etgan. Bundan maqsad bandam dunyodan bexabar qolmasin, o'zining kimligini unutmasin, Alloh bergan aql bilan hunar o'rganib, zaminni obod qilsin, yashnatsin degan. Yana insonlarga Alloh taolo mehr-oqibatni ham bergan.
Nechun shunday fazilatlarga ega bo'lgan insonlar bir-birlari bilan bu o'tkinchi dunyoda talashib-tortishib, buzuq ishlarga ruju' qo'yib, begunoh odamlarning qonini to'kadilar. El tinchligini buzib, inson hayotiga tajovvuz qilishlik Qur'oni karimda ham qoralangan. Bu borada shunday deyiladi:
“Kimki biror jonni o'ldirmagan va erda buzg'unchilik qilib yurmagan odamni o'ldirsa, demak, go'yo barcha odamlarni o'ldiribdi”.
Begunoh odamning joniga qasd qilib, uni o'ldirishlik shar'iy haromdir. Bu borada Alloh taolo Qur'oni karimda shunday deydi:
“Kimki qasddan bir mo'minni o'ldirsa, uning jazosi jahannam bo'lib, u o'sha joyda abadiy qolajak va u odam Allohning azobi va la'natiga duchor bo'lgan. Alloh uning uchun ulug' azobni tayyorlab qo'ygandir”.
Alloh taolo barchamizni, farzanlarimzni mana shunday xar xil firka va okimlarni ta'siriga tushib kolishdan saklasin. Doimo yurtimizni tinch osmonimizni musaffo qilib, o'zaro tinch totuvlikda hayot kechirishimizni nasib etsin.
Yunusov Mustafo
Toshkentda "Islom sivilizatsiyasi: yangi nigoh – yangi kashfiyotlar" xalqaro mediaforumi ochildi
Toshkentda 25 avgust kuni O‘zbekiston Prezidenti Shavkat Mirziyoyev tashabbusi bilan tashkil etilgan «Islom sivilizatsiyasi: yangi nigoh — yangi kashfiyotlar» xalqaro mediaforumining rasmiy ochilish marosimi bo‘lib o‘tdi.
Marosim O‘zbekistondagi Islom sivilizatsiyasi markazining Katta konferens-zalida o‘tkazildi. Tadbir ishtirokchilariga «Jahon jamoatchiligining Islom sivilizatsiyasi markaziga nigohi» maxsus filmi namoyish etildi.
Tadbirda O‘zbekiston Prezidenti matbuot kotibi, Prezident Administratsiyasi Kommunikatsiyalar departamenti rahbari Sherzod Asadov tabrik so‘zi bilan ishtirok etdi. O‘zbekiston Respublikasi Prezidenti Administratsiyasi maslahatchisi Muzaffar Komilovning forum ishtirokchilariga yo‘llagan murojaatini O‘zbekiston Respublikasi Prezidenti Administratsiyasining mas’ul xodimi Rahmatulla Arziyev o‘qib eshittirdi.
Forum ishtirokchilariga yo‘llangan qutlov so‘zlarida xorijiy mehmonlar va media hamjamiyati vakillariga minnatdorlik bildirildi. Forumning professional muloqot, xalqaro hamkorlik va O‘zbekistonning tarixiy-madaniy merosini ilgari surish maydoni sifatidagi ahamiyati ta’kidlandi.
Marosimning asosiy voqealaridan biri Euronews bosh direktori va bosh muharriri Klaus Shtrunsning «Yangi yaqinlik: madaniyat, media va g‘oyalar orqali Yevropa va Markaziy Osiyoni birlashtirish — Islom sivilizatsiyasi markazi global axborot makonida» mavzusidagi maxsus ma’ruzasi bo‘ldi.
Shtruns islom sivilizatsiyasining tarixiy, ilmiy, ma’naviy va madaniy merosini zamonaviy media formatlar orqali jahon auditoriyasiga yetkazish, shuningdek, Yevropa va Markaziy Osiyo o‘rtasida axborot almashinuvini kuchaytirish muhimligini ta’kidladi.
Uning qayd etishicha, media vositalari turli mamlakatlar va jamiyatlar o‘rtasida nafaqat axborot almashinuvini ta’minlashi, balki muloqot uchun ko‘priklar ham qurishi kerak.
«Media vositalari fikrlar va yangiliklar almashinuvi uchun ko‘priklar qurishi mumkin va qurishi shart. Axir media kommunikatsiyasining mohiyati ham aynan shunda — ko‘priklar qurishda. Bugun bu yerda, qadimiy Ipak yo‘lida, kelajagimiz uchun aynan shu jarayon sodir bo‘lmoqda», — dedi Klaus Shtruns.
Euronews rahbari Yevropa va Markaziy Osiyo o‘rtasidagi axborot makonini yanada yaqinlashtirishni tarixiy Ipak yo‘li an’analari bilan qiyosladi. Uning ta’kidlashicha, mintaqalar o‘rtasidagi zamonaviy media aloqalar iqtisodiy, madaniy va ijtimoiy hamkorlikning yangi imkoniyatlarini ham ochishi mumkin.
«Ipak yo‘lida axborot oqimi qanday kechgan bo‘lsa, bir-birimiz bilan muloqot qilish, bir-birimizning tilimizni tushunish ham shunday bo‘lsin. Bu oddiy texnik jarayondan ko‘ra kengroq tushuncha. Bu haqiqiy hamkorlikning yangi ko‘rinishi, kelajakdagi butun iqtisodiy taraqqiyot uchun harakatlantiruvchi kuch bo‘ladigan yangi axborot makonidir», — dedi u.
Klaus Shtruns, shuningdek, O‘zbekistonda yosh avlodning katta ulushga ega ekanini alohida qayd etib, bu mamlakatning kelajagi uchun ulkan imkoniyat ekanini ta’kidladi. U turli mamlakatlar yoshlarini birlashtiruvchi media va madaniy loyihalarni amalga oshirish taklifini ilgari surdi.
Uning fikricha, turli sohalar — sport, ilm-fan, ta’lim va madaniyat vakillaridan iborat yoshlarni bir joyga to‘plab, ularning tajriba almashinuvi, hujjatli filmlar suratga olishi va qo‘shma loyihalarda ishtirok etishi uchun imkoniyat yaratish mumkin. Bunday tashabbuslar orqali mamlakatlar va mintaqalar yoshlari o‘rtasida yangi aloqalarni shakllantirish mumkin.
«Bu faqat chiroyli nutqlarda emas, balki aniq va amaliy loyihalarda o‘z ifodasini topishi kerak», — dedi Euronews bosh direktori.
Shtruns media sohasidagi innovatsiyalar ham aynan shu maqsad — o‘tmish merosini asrab, kelajakni birgalikda yaratishga xizmat qilishi kerakligini ta’kidladi.
«Eng muhimi, media doimo innovatsiyalarni harakatga keltiruvchi kuch bo‘lishi kerak. Ammo bu innovatsiyalar bugun men eshitgan ajoyib maqsadga xizmat qilishi lozim: media sohasida innovatsiyalarni ilgari surish, qalbimizda o‘tmishni asrab, kelajakni yaratish», — dedi u.
Euronews rahbari forumda ishtirok etishni media sohasining jamiyat oldidagi mas’uliyati bilan bog‘ladi. Uning ta’kidlashicha, jurnalistika va media faoliyati faqat biznes yoki kasb emas, balki turli jamiyatlarni yaqinlashtirishga xizmat qiladigan muhim vazifadir.
«Ushbu noodatiy tadbirda media hamkor sifatida ishtirok etayotganimizdan faxrlanamiz. Biz uchun bu shunchaki biznes emas, oddiy kasb ham emas. Bu — o‘z burchimiz va da’vatimizdir», — dedi Klaus Shtruns.
Shu tariqa, forumning ochilish marosimida media sohasining zamonaviy vazifalari, xalqaro axborot hamkorligini rivojlantirish, madaniy merosni yangi formatlarda jahon auditoriyasiga taqdim etish va turli mintaqalar o‘rtasida yangi axborot ko‘priklarini barpo etish masalalariga alohida e’tibor qaratildi.
O‘zbekistondagi Islom sivilizatsiyasi markazi direktori, WOSCU Boshqaruv raisi Firdavs Abduxaliqov «Islom sivilizatsiyasi markazi — yangi turdagi madaniy-ma’rifiy media platforma» mavzusida maxsus ma’ruza qildi.
Abduxoliqov Markaz konsepsiyasini tarixiy meros, ilm-fan, muzey ishi va yangi medialarni birlashtiruvchi zamonaviy xalqaro maydon sifatida taqdim etdi. U islom sivilizatsiyasi merosi hujjatli filmlar, televizion loyihalar, raqamli rekonstruksiyalar, multimedia va immersiv ekspozitsiyalar, shuningdek, nashriyot tashabbuslarida qanday yangi talqin kasb etayotgani haqida ma’lumot berdi. Markazning xalqaro media loyihalari, dunyodagi yetakchi ommaviy axborot vositalari bilan hamkorligi, shuningdek, tarixiy merosni o‘rganish va ommalashtirishda sun’iy intellekt hamda raqamli texnologiyalardan foydalanish masalalariga alohida e’tibor qaratildi.
Marosim ishtirokchilariga, shuningdek, Islom sivilizatsiyasi markazi haqida prezentatsion rolik namoyish etildi.
Xalqaro mediaforumda 50 ta davlatdan media va ekspertlar hamjamiyatining 300 nafarga yaqin vakili ishtirok etmoqda. Ular orasida xalqaro telekanallar va axborot agentliklari rahbarlari hamda vakillari, jurnalistlar, noshirlar, kinematografistlar, olimlar, tadqiqotchilar va raqamli texnologiyalar sohasi mutaxassislari bor.
iccu.uz
