Kecha, 28 may kuni Qoraqalpog'iston Respublikasi Taxtako'pir tumani “Dao'qara” ovul fuqarolar yig'ini hududida yangi qurilgan “Abdulkariym Axun” jome masjidi ochilish marosimi bo'lib o'tdi. Unda Qoraqalpog'iston Respublikasi Adliya vaziri Saulaubay Mambetkadirov, Qoraqalpog'iston Respublikasi qoziyoti qozisi Shamsiddin domla Bauatdinov, mutasaddi vakillar, imom domlalar, ovul ahli ishtirok etdi.

Tadbir davomida so'zga chiqqan notiqlar masjid ahlini jome bilan muborakbod etib, yurtimizda diniy-ma'rifiy sohada qilinayotgan ishlar haqida so'zladi, iliq tilaklar bildirdi. Shuningdek, unda Qoraqalpog'iston Respublikasi Adliya vaziri Saulaubay Mambetkadirov jome xodimlariga masjidning davlat ro'yxatidan o'tkazilgani to'g'risidagi guvohnomani topshirdi.

Masjidning ochilish marosimi kunlarning ulug'i muborak jumada hudud ahligi tuhfa bo'ldi, unda tadbir qatnashchilari jamoat bo'lib juma namozini ado etib, namozxonlar bilan xayrli duolar qilindi.

Ma'lumot uchun, masjid qurilishi sohovatpesha insonlar ko'magi va xalq hashari yo'li bilan 2021 yil boshida boshlanib, hozirga kelib to'liq bitkazilgan. Shu bilan mamlakatimizdagi masjidlar soni 2091 taga, Qoraqalpog'istonda esa 55 taga etdi.

Jome 120 nafar namozxonga mo'ljallangan katta xonaqoh, bir vaqtning o'zida 15 kishi foydalanishi mumkin bo'lgan zamonaviy tahoratxona va ma'muriyat xonalarini o'z ichiga olgan. Katta gumbaz va binoga qo'shilib ketgan ikki minora masjidga o'zgacha ko'rk berib turibdi.

Masjid o'z davrining ma'naviyat va ma'rifat nurini tarqatgan din peshvosi, ulamo, ko'plab tolibi ilmlarining ustozi bo'lgan Abdulkariym Axun nomiga qo'yildi. Hozirda respublika qoziyoti tomonidan masjidga imom-xatiblikka nomzodning hujjatlari mutasaddi tashkilotlarga yuborilgan.

Alloh taolo ushbu baytullohning qiyomatgacha mo'min-musulmonlarga xizmat qilishini, uning barpo bo'lishiga hissa qo'shganlar bandalariga va'da qilgan ajru mukofotlarni ko'paytirib berishini, bundan xayrli ishlari bardavom bo'lishini nasib qilsin!

O'zbekiston musulmonlari idorasi matbuot xizmati