Masjidlar Alloh taologa eng mahbub maskanlardir. Payg'ambarimiz Muhammad sollallohu alayhi va sallam: “Shaharlarning Allohga eng mahbub joyi – masjidlaridir”(Imom Muslim rivoyati), deb marhamat qilganlar. Chunki masjidlarda Alloh taologa ibodat qilinadi, U zotga zikrlar aytiladi, tasbehlar tushiriladi.

Ana shunday ma'volardan biri Toshkent viloyati Angren shahridagi “Yoshlik” mahalla fuqarolar yig'ini hududidagi Ohangaron va Baxt ko'chalari chorrahasida barpo etilishi rejalashtirildi. Barcha qulayliklarga ega bo'ladigan bu jome masjid Toshkent bilan vodiy viloyatlarini bir-biriga bog'lovchi A-373 xalqaro avtomobil' yo'li bo'yida 0.70 gektra maydonda barpo etilayotgani yurtimizning ham ichki, ham xalqaro sayyohlik salohiyatini yanada mustahkamlaydi.

Masjidlar Alloh taoloning Yer yuzidagi uylaridir. Ular er yuzidagi eng pokiza makonlardir. Minoralardan azon sadolari yangraydi, tavhid kalimalari takrorlanadi. Masjidlar uzra rahmatlar yog'iladi, masjid ahlini sakinat o'rab oladi, masjid ahlining ustiga barakalar yog'iladi.

Masjidlar ma'rifat maskanidir. Saodat asrida elchilar masjidlarda kutib olingan. Turli mamlakatlarga musulmon elchilar masjidlardan tarqalishgan. Alloh taolo masjidlarni shirk va kufrdan toza saqlab, bunday marhamat qiladi: «Albatta, (barcha) masjidlar Allohnikidir. Bas, (masjidlarda) Alloh bilan qo'shib yana biror kimsaga duo (ibodat) qilmangiz!”(Jin surasi, 18-oyat).

Masjidlar obodligi toat-ibodat bilan, zikrlar, tasbehu tamhidlar ila bo'ladi. Alloh taolo Qur'onda karimda: «(U) bir uylardaki, Alloh ularning ko'tarilishiga va ularda O'z ismi zikr qilinishiga izn bergandir. Ularda Unga ertayu kech  tasbeh ayturlar» deb marhamat qilingan (Nur surasi, 36-oyat).

Dinimiz bizlarni masjidlar qurishga va ularni obod etishga chaqirgan. Bu ishni jannatga olib boradigan va Allohning rizosiga erishtiradigan yo'l deb e'lon qilgan: “Kim Allohning roziligini tilab bir masjid qursa, Alloh jannatda unga o'shaning mislini qurib beradi”,(Imom Buxoriy rivoyati).

Mo'min kishi Alloh taoloning uylarini obod qilishga, u erda namoz o'qib, ma'naviy fayzli qilishga urinar va qalbi doimi masjidlarga bog'liq ekan, ikki dunyo baxtu saodatiga, xayru barakasiga erishajak, inshoalloh.

Angren, Chirchiq va Olmaliq shaharlari hamda viloyatimizning boshqa hududlaridagi masjidlarni barpo etilishiga o'zining hissasini qo'shayotgan saxovatpesha mo'min-musulmonlarga Rabbim jannatlardan O'zi va'da qilgan qasrlarni nasib aylasin.

Jasurbek domla RAUPOV,

Toshkent viloyati bosh imom-xatibi