O'zbekiston Transport vazirligida BAA aviatsiya ma'muriyati vakillari bilan muzokaralar bo'lib o'tdi, deb xabar bermoqda «Dunyo» AA.
Transport vazirligi ma'lum qilishicha, uchrashuvda ikki mamlakat o'rtasida fuqaro aviatsiyasi sohasidagi hamkorlik aloqalarini kengaytirish masalalari muhokama qilindi.

Parvozlar chastotasini ko'paytirish, yangi yo'nalishlarda aviaqatnovlarni yo'lga qo'yish xususida fikr almashildi.

Ikki mamlakat aviatsiya ma'muriyati vakillari maslahatlashuvlar yakunlari bo'yicha quyidagi kelishuvlarga erishdi:

- «Fly Dubai» aviakompaniyasi Dubay – Toshkent – Dubay yo'nalishida parvozlar chastotasini haftasiga 5 tadan 6 ta reysga oshiradi;
- «Air Arabia PJSC» aviakompaniyasi Sharja – Toshkent – Sharja yo'nalishida parvozlar chastotasini haftasiga 2 tadan 3 ta reysga ko'paytiradi;
- «Air Arabia Abu Dhabi» aviakompaniyasi esa Abu-Dabi – Toshkent – Abu-Dabi yo'nalishida parvozlar chastotasini haftasiga 2 tadan 4 ta reysga qadar ko'paytiradi.

Shuningdek, «Wizz Air Abu Dhabi» aviakompaniyasiga Buxoro va Urganch shaharlariga parvozlarni amalga oshirish huquqi berildi.
Uchrashuv yakunida tomonlar kelgusida konstruktiv muloqot va o'zaro manfaatli hamkorlikni qo'llab-quvvatlash borasida kelishib oldi.

O'zbekiston musulmonlari idorasi matbuot xizmati