O‘zbekistoning elchisi Karomiddin Gadoyev Malayziyaning Jahon sufiylar markazi bosh kotibi Abdul Karim Said Xadaid bilan uchrashdi, deb xabar qilmoqda "Dunyo" AA muxbiri.
 

Suhbat chog‘ida O‘zbekistonda ziyorat turizmini rivojlantirish, musulmon davlatlari bilan "Umra plyus" dasturini yo‘lga qo‘yish, shuningdek Buxoro shahrida beshinchi "Naqshbandiya" sayyohlik festivalini o‘tkazish masalalari muhokama qilindi.

Abdul Karim Said Xadaid ziyorat turizmi sohasida O‘zbekiston tomoni bilan ko‘p yillik hamkorligi hamda Malayziya tajribasidan foydalangan holda, mamlakatimizda mazkur sohani rivojlantirish bo‘yicha o‘zbek tomoni bilan hamkorlik qilishga katta qiziqish bildirdi.

Bosh kotib davlatimiz rahbarining "Umra plyus" dasturini amalga oshirish bo‘yicha tashabbusini to‘liq qo‘llab-quvvatlashini va bu loyihani Jahon sufiylar markazi orqali musulmon davlatlar orasida doimiy ilgari surishga tayyorligini bildirdi.

U, shuningdek, O‘zbekistonning ziyorat turizmi sohasida ish olib borayotgan turistik operatorlar va agentlar faoliyatini takomillashtirish bo‘yicha takliflarini ma’lum qildi.

Uchrashuvda muhokama qilingan masalalar va takliflarni, shu jumladan joriy yil sentyabr oyida Buxoro shahrida beshinchi "Naqshbandiya" sayyohlik festivalini o‘tkazish tashabbusini O‘zbekiston Ekologiya, atrof-muhitni muhofaza qilish va iqlim o‘zgarishi vazirligi huzuridagi Turizm qo‘mitasi bilan birgalikda ishlab chiqishga kelishib olindi.

O‘zbekiston musulmonlari idorasi
Matbuot xizmati