O'zbekistonning Pokistondagi ziyorat turizmi elchisi Pir Hasib ur-Rahmon «Dunyo» AA uchun bergan interv'yuda so'nggi yillarda O'zbekistonda boy diniy-ma'naviy merosni o'rganish, mamlakatda yashayotgan turli millat vakillarining milliy va diniy qadriyatlarini asrab-avaylash bo'yicha islohotlarni e'tirof etdi.

– Bugun O'zbekiston va Pokiston o'zaro aloqalarni har tomonlama rivojlantirmoqda. Ularni uzoq tarixga ega rishtalar bog'lab turibdi, – dedi Pir Hasib ur-Rahmon. – O'zbekiston xalqiga eng ezgu tilaklarimni izhor etishdan behad mamnunman. Ikki qardosh davlat o'rtasidagi aloqalarni yanada rivojlantirish uchun duo qilaman.

O'zbekiston Pokistonning Markaziy Osiyodagi asosiy savdo hamkori hisoblanadi. Toshkent tomonidan 2020 yilning iyulida Islomobodga pandemiya paytida ko'rsatilgan insonparvarlik yordami fikrimni yaqqol tasdiqlaydi.

Prezident Shavkat Mirziyoev rahnamoligida respublikada amalga oshirilayotgan islohotlar, jumladan, sayyohlik va ziyorat turizmi sohasidagi vazifalar Pokistondagi Naqshbandiya tariqati izdoshlari tomonidan yuksak baholanmoqda.

O'zbekiston turizm maskani safatida ziyoratchilarga nafaqat Toshkent, Samarqand, Buxoro, Hiva shaharlarida diqqatga sazovor tarixiy joylar bilan tanishish, balki o'zbek diyorini islom madaniyati va tsivilizatsiyasi markaziga aylantirgan buyuk mutafakkir va allomalar merosidan bahramand bo'lish, ushbu bebaho boylikni o'rganish uchun qulay imkoniyat taqdim qilmoqda.

Ma'lumki, O'rta asrlar Renessansi davrida bugungi O'zbekiston zaminidan Imom Buxoriy, Imom Termiziy, Bahouddin Naqshbandiy va boshqa ko'plab buyuk mutafakkirlar, so'fiylar, olimlar, ilohiyotchilar etishib chiqqan. Ular o'z ilmiy-ma'rifiy dahosi bilan, jumladan, Janubiy Osiyo tamadduniga ham bevosita ta'sir ko'rsatgan.

Bugungi kunda O'zbekiston rahbariyati boy ma'naviy-ma'rifiy merosni, islom ulamolarining ilmiy asarlarini, shuningdek, diniy bag'rikenglikni chuqur o'rganish va ommalashtirish borasida izchil izlanishlarga qat'iy da'vat etmoqda.

Halqaro islom akademiyasi, Islom tsivilizatsiyasi markazi, Din ishlari bo'yicha qo'mita, shuningdek, Imom Buxoriy va Imom Moturidiy ilmiy-tadqiqot markazlari ana shu maqsadlarga xizmat qilyapti.

Men Pokistondagi Naqshbandiya tariqati izdoshlari delegatsiyasi tarkibida O'zbekistonga safar qilib, mamlakatdagi diniy-ma'rifiy ilm-fan sohasidagi katta o'zgarish va yangilanishlar jarayoni hamda xalqaro Islom akademiyasi va ilmiy markazlar qurilishi bilan yaqindan tanishish sharafiga muyassar bo'ldim.
Ta'kidlash kerakki, Pokiston islom mafkurasi kengashi, Din ishlari va tashqi ishlar vazirligi O'zbekiston islomiy markazlari bilan yaqin hamkorlik qilishga tayyor.

O'zbekiston Pokiston kabi so'fiylik an'analari mamlakatidir. Ushbu zaminda dunyoga buyuk hadisshunos va ilohiyotchi olim Imom Buxoriy, shuningdek, Hazrati Bahouddin Naqshband va boshqa ko'plab buyuk shaxslar tavallud topib, voyaga etgan, o'zlaridan bebaho meros qoldirgan.

Ishonchim komilki, bu boradagi sheriklikni rivojlantirish xalqlarimiz o'rtasidagi o'zaro anglashuv va do'stlikni mustahkamlashning muhim istiqbollarini ochib beradi.

To'g'ridan-to'g'ri reyslarning qayta tiklanishi Pokistondagi Naqshbandiya tariqati izdoshlari tomonidan iliq kutib olinadi. Chunki ko'plab muridlarimiz O'zbekistonga ziyoratga borishni istaydi. Bu imkoniyat umumiy imon, madaniyat, an'ana va tarix bilan bog'langan ikki qardosh xalqni yanada yaqinlashtiradi.

O'zbekiston musulmonlari idorasi matbuot xizmati