Armonda qoldik...
Bismillahir Rohmanir Rohim
Innaa lillaahi va innaa ilayhi roji'uun.
Ulug' mutafakkir, hassos adib, fozil inson, hayrat va nidoda, faxr va armonda, imon va e'tiqodda musaffo, darchil tuyg'ular sohibi ustoz Ahmad Muhammad hoji dada bugun oramizdan dorulbaqoga ko'chdilar. Ey, darig'! Bir butun nuktadon, daqiqnavis allomaning umrlari poyoniga etdi.
Ustoz ko'plab diniy-ma'rifiy, badiiy, ilmiy, tarixiy asarlar muallifi va muharriri, xususan, “Tafsiri Irfon” Qur'oni karim ma'nolarining tarjima va tafsirining adabiy muharrriri Ahmad Muhammad Tursun 1949 yilda Namangan shahrida tug'ilganlar. 1967 yildan boshlab matbuotda faoliyat olib boradilar.
Qalamlari haqiqat uzra yo'naltirilgan ustoz “Namangan haqiqati” gazetasida turli vazifalarda, jumladan, “Namangan atlasi”, “Irfon”, “Tarjimon”, “Suhbatdosh”, “Hayrat” ro'znomalarida bosh muharrir bo'lib xalqimizning qalb-qo'rini saxifalarga tushirgan muhaqqiq edilar.
2003-2010 yillarda “Hidoyat” jurnalida bo'lim muharriri bo'lib, uning sahifalariga hikmat durdonalarini taratdilar.
2014 yildan buyon, “Hilol-Nashr” nashriyotining muharriri, nashriyot tomonidan har oy chop qilinadigan “Hilol” diniy-ma'rifiy, ijtimoiy-adabiy jurnalining noshiri, “Oltin silsila” hadislar to'plami muharrirlar hay'ati a'zosi, yoshlarga o'rnak bo'lib kelayotgan tahririyatning mahorat sohibi edilar.
Marhum adibning ellikka yaqin diniy, badiiy, ilmiy-ma'rifiy kitoblari nashr etilib, buyuk xalqimiz ardog'ida o'qib, o'rganib kelinmoqda.
Ustoz tasnif etgan barcha nur chashmalarga to'lgan asarlari misoli zikru suhbat qilayotgandek ta'sir kuchiga ega edi.
Inson erishishi kerak bo'lgan eng yuksak martaba va axloq bobida namuna bo'lgan oliyjanob ziyo nuri edilar.
Bu kabi buyuk nurli yo'l sohibi ustozimiz yoshlik davridan to umrlarining oxirigacha o'tkir zehn, teran zakovat, zuhdu taqvo bilan hamnafas yashab o'tdilar.
U kishining so'zlari, iqrorlari, axloq hamidalari barchaga ibrat edi.
U oliyjanob inson taratgan hikmatlardan insonni qalbi poklanib, ruhiy ozuqalanib, ilohiy madadga sug'orilardingiz.
Bu muhtaram inson hidoyat yo'lini aniq ushlab, bu muborak yo'lda yaxshilik izlovchilarga yo'ldosh bo'ldilar.
Dunyo va oxiratning ezgulik hazinasini meros qoldirdilar. Mo'min-musulmonda bo'lgan barcha go'zal sifatlarni o'zlarida mujassam etdilar.
Ustoz adabiyot bobida yulduz bo'lish bilan bir qatorda, xulqu odobda, xushmuomala va sadoqatda, qanoat va riyozatda ham tengsiz ekanliklari bizning qalbimizga o'z naqshini qoldirmoqda.
Taqdirga tabdil yo'q! Biz ayriliq jafosini tortib turgan oila a'zolariga, nuridiyda farzandlariga, aka-uka jigargo'shalariga, habib muxlislariga o'zimizning ta'ziyamizni bildiramiz.
Allohdan sabru jamil tilaymiz. Allohim ustozning ruhlarini bizlarning duolarimiz bilan ravhu rayhon aylasin! Omiyn, Ya Robbal Alamiyn.
Abdulhay Abdulhafiz o'g'li
Malayziya telekanalida O‘zbekistonning ziyorat turizmi imkoniyatlari keng yoritildi
Malayziyaning “Berita RTM” telekanalida O‘zbekistonda ziyorat turizmi sohasida amalga oshirilayotgan islohotlarga bag‘ishlangan maxsus dastur namoyish etildi, deb xabar bermoqda “Dunyo” AA.
Mamlakatimiz mustaqilligining 35 yilligi arafasida efirga uzatilgan ushbu ko‘rsatuvda malayziyalik professorlar – Badrul Isa va Norfadilah Kamaruddin tomonidan ishlab chiqilgan “O‘zbekiston–Malayziya: kreativ turizm” nomli loyiha taqdim etildi.
Olimlar tashabbusi bilan yaratilgan mazkur loyiha mamlakatimizning Malayziyadagi elchixonasi, Turizm qo‘mitasi va Islom sivilizatsiyasi markazi hamkorligida amalga oshirildi.
Tashabbus O‘zbekistonning turizm imkoniyatlari haqida “Visual storytelling” formatida professional raqamli kontent yaratishni nazarda tutadi.
Loyihaga ko‘ra, 17–31 avgust kunlari Malayziya UiTM texnologiya universitetining professional fotograflari va dizaynerlaridan iborat ijodiy jamoa Toshkent, Samarqand, Buxoro va Xorazmda suratga olish ishlarini olib boradi.
Malayziyalik ijodkorlar yurtimiz haqida tayyorlagan foto va videomateriallar “Instagram”, “Facebook”, “TikTok”, “YouTube” kabi internet platformalarda joylashtirilishi rejalashtirilgan. Loyihada yurtimiz oliy o‘quv yurtlarining dizayn, san’at, turizm va mehmonxona biznesi yo‘nalishidagi talabalari ham ishtirok etadi. Bu akademik, turizm va ijodiy sohalarda tajriba almashishni tashkil etish imkonini beradi.
Dasturda fikr bildirgan Badrul Isa loyiha ASЕAN mamlakatlari va musulmon olamida O‘zbekistonni yanada kengroq tanitishga xizmat qilishini ta’kidladi. Uning fikricha, raqamli platformalar orqali mamlakatimiz tarixiy merosi, ziyorat turizmi va amalga oshirilayotgan so‘nggi o‘zgarishlari keng yoritiladi.
“Biz boy tarixiy meros, yuksak madaniyat va mehmondo‘st xalqqa ega bo‘lgan O‘zbekistonni ASЕAN mintaqasi aholisi tomonidan qayta kashf etilishini istaymiz”, – dedi professor.
Shuningdek, u O‘zbekiston xalqini mustaqillikning 35 yilligi bilan tabriklab, loyiha natijalari ushbu sanaga munosib sovg‘a bo‘lishini qayd etdi.
Ushbu tashabbus O‘zbekistonning ziyorat turizmini ommalashtirish va ASЕAN mamlakatlaridan ko‘proq sayyohlarni jalb qilishga xizmat qilishi kutilmoqda.
O‘zbekiston musulmonlari idorasi Matbuot xizmati
