Afg'oniston Oliy milliy yarashuv kengashi raisi maslahatchisining O'zbekiston haqidagi taassurotlari
Afg'oniston Oliy milliy yarashuv kengashi raisi maslahatchisi va Milliy birdamlik partiyasining shimoliy hududlar bo'yicha rahbari Al-Hoj Muhsin Donesh «Dunyo» AA uchun bergan interv'yusida O'zbekiston ijtimoiy hayotida ro'y berayotgan o'zgarishlar, diniy-ma'rifiy sohada amalga oshirilayotgan islohotlar, milliy qadriyatlar va ulug' ajdodlar merosini targ'ib etish va saqlash yo'nalishida qilinayotgan chora-tadbirlarni e'tirof etdi.
– O'zbekistonda diniy-ma'rifiy qadriyatlarni avaylab asrash va tarixiy obidalarni tiklash masalasida amalga oshirilayotgan islohotlar diqqatga sazovordir, - dedi u. – Buni biz O'zbekistonga qilgan tashriflarimiz davomida, xususan, Toshkent, Buxoro, Samarqand, Hiva va Termiz shaharlarida bo'lganimizda his qilganmiz.
Mamlakat rahbariyati dunyoda kechayotgan turli murakkab jarayonlarga qaramasdan, o'z taraqqiyot yo'nalishini to'g'ri tanlab olgan va bu yo'ldan og'ishmay rivojlanishda davom etmoqda. Bu, jumladan, diniy va madaniy sohalarda yaqqol ko'zga tashlanyapti. Biz O'zbekistonda diniy-ma'rifiy sohada jiddiy ijobiy islohotlar amalga oshayotganiga guvoh bo'layapmiz.
Kuzatuvlarim davomida O'zbekistonda diniy islohotlar ikki yo'nalishda olib borilayotganiga shohid bo'ldim. Birinchisi, diniy ekstremizm va ayrimachilikning tarqalishiga yo'l qo'ymaslik uchun o'z tajribasiga tayangan islohotlarning amalga oshirilayotganidir. Bu jarayonni shaxsan men ijobiy baholayman. Chunki dunyo davlatlarida kechayotgan jarayonlarni tahlil qiladigan bo'lsak, diniy ekstremizm va ayrimachilik davlat asoslariga jiddiy zarba etkazadigan omillardan biri hisoblanadi. Ikkinchi yo'nalish - bu diniy islohotlar natijasi — yangi madrasalar, ilmiy-tadqiqot markazlari, ulamolar kengashi va ko'plab diniy tashkilotlar ochilayotganidir. Jumladan, islom olamida yuksak obro'ga ega bo'lgan Imom Termiziy tadqiqot markazi bunga yaqqol misol bo'la oladi.
O'zbekiston ushbu ijobiy islohotlari bilan har qanday ekstremizm va ayrimachilikdan xoli bo'lgan mo''tadil sof islom namunasini (Qur'oni Karimdagi oyatga muvofiq “Va kazolika ja'alnaakum ummatan vasatan”, ya'ni “Biz Sizlarni bir mo''tadil ummat qildik”) dunyo hamjamiyatiga namoyish qilmoqda.
O'zbekistonda diniy bag'rikenglik tamoyillaridan og'ishmasdan barcha dinlar bir-birlarini inkor qilmagan holda mavjud qonunlar asosida rivojlanmoqda.
Yaqin Sharq mamlakatlari — Suriya va Iroqdagi urush o'choqlariga borib qolgan, og'ir sharoitga tushib qolgan fuqarolarni Prezident Shavkat Mirziyoevning shaxsiy tashabbusi va qat'iyati bilan Vatanga qaytarish ishlari amalga oshirilmoqda. Bunday insonparvarlik tadbirlari har qancha tahsinga sazovor.
O'zbekiston musulmonlari idorasi matbuot xizmati
Xalqaro forum oldidan matbuot anjumani o‘tkazildi
Bugun O‘zbekistondagi Islom sivilizatsiyasi markazida yurtimizda 7-11 iyul kunlari o‘tkaziladigan “Islom sivilizatsiyasi: tinchlik, bag‘rikenglik va ilm-ma’rifat yo‘li” mavzusidagi I Xalqaro Islom sivilizatsiyasi forumi yuzasidan matbuot anjumani bo‘lib o‘tdi.
Anjumanda Islom sivilizatsiyasi markazi direktori Firdavs Abduxoliqov, Din ishlari bo‘yicha qo‘mita raisining birinchi o‘rinbosari Davronbek Maqsudov, Imom Moturidiy xalqaro ilmiy-tadqiqot markazi direktori Komiljon Shermuhamedov, ISЕSKO rahbari Salim Muhammad hamda xalqaro al-Furqon jamg‘armasi raisi Sali Shahsuvariy so‘zga chiqdi.
Matbuot anjumanida mazkur nufuzli tadbirning maqsad va vazifalari, uning xalqaro ahamiyati hamda forum doirasida rejalashtirilgan ilmiy-ma’rifiy tadbirlar haqida ma’lumot berildi.
Ta’kidlanganidek, Toshkent, Samarqand va Termiz shaharlarida o‘tkazilayotgan forumda dunyoning turli mamlakatlaridan taniqli ulamolar, muftiylar, islomshunos olimlar va xalqaro tashkilotlar vakillari ishtirok etadi.
Ushbu forum islom dinining tinchlik, bag‘rikenglik, ilm-ma’rifat va insonparvarlikka asoslangan asl mohiyatini xalqaro jamoatchilikka yetkazishda muhim ahamiyat kasb etishi ta’kidlandi. Shu bilan birga, mazkur anjuman O‘zbekistonning islom sivilizatsiyasi rivojidagi tarixiy o‘rni, buyuk allomalar merosi va ma’rifiy an’analarini dunyo miqyosida yanada keng namoyon etishga xizmat qilishi alohida qayd etildi.
Ma’lumot o‘rnida, shu yil 7–8 iyul kunlari Toshkentdagi Islom sivilizatsiyasi markazida konferensiyalar bo‘lib o‘tadi. 9–10 iyul kunlari esa Samarqand va Termiz shaharlarida Imom Buxoriy, Imom Moturidiy va Imom Termiziyning ilmiy-madaniy merosiga bag‘ishlangan xalqaro konferensiyalar tashkil etiladi.
Forum doirasidagi bunday uchrashuv va muhokamalar ilm-fan, dinlararo muloqot, bag‘rikenglik va ma’rifat tamoyillarini mustahkamlashda muhim amaliy maydon vazifasini bajaradi.
O‘zbekiston musulmonlari idorasi
Matbuot xizmati
- «
- »