Habar berganimizdek, xorij davlatlari diniy idoralaridan kelgan takliflar asosida yurtimiz qorilari taroveh namozlarida Qur'oni karimni xatm qilib berish va diniy-ma'rifiy tadbirlar o'tkazish uchun chet mamlakatlarda bo'lib turishibdi.

Jumladan, AQShdagi Turkiston – Amerika jamiyatining rasmiy taklifiga binoan Toshkent shahridagi “Ahmadjon qori” masjidi imom-xatibi Muhammadiy qori Ergashev Qo'shma shtatlarida;

Rossiya Federatsiyasi Uzoq sharq musulmonlari diniy idorasi taklifiga ko'ra, Toshkent shahridagi “To'lqin Akrom o'g'li” masjidi imom noibi Jamoliddin Qodirov va “Said Vaqqos ota” masjidi imom noibi Fazliddin Mamadaliyev Vladivostok va Janubiy Saxalin shaharlarida;

Ukraina musulmonlari idorasining taklifiga ko'ra, O'zbekiston musulmonlari idorasi xodimi Farrux qori Hudoyberdiyev Kiyev shahridagi masjidlarda mahalliy musulmonlar jamoati bilan taroveh namozlarida Qur'oni karimni xatm qilish, mazmunli diniy-ma'rifiy tadbirlar o'tkazish uchun borgan edi.
Horijdagi mahoratli qorilarimizning O'zbekiston musulmonlari idorasi xalqaro aloqalar bo'limiga xabar berishicha, Amerika, Rossiya va Ukrainadagi jome masjid va jamoat tashkilotlarida yurtimiz vakili sifatida xizmat safarida bo'lib turgan qorilarimiz Ramazon oyida masjid jamoatiga taroveh namozlarida imom bo'lib Qur'oni karimni muvaffaqiyatli xatm qilishgan.

Qorilarimiz taroveh namozi asnosi, iftorlik marosimlari va boshqa Ramazon tadbirlarida mahalliy musulmonlarga ma'rifiy suhbatlar uyushtirishgan. Ularda ikki mamlakatning yaxshilik yo'lidagi hamkorliklari, xalqimizning urf-odatlari, yurtimidagi ezgu ishlar haqida ma'lumotlar berildi. Natijada qorilarimiz faxriy yorlik va tashakkurnoma, mahalliy aholining duoi xayrlariga sazovor bo'lishdi. Hozirda qorilarimiz Vatanga qaytishga tayyorgarlik ko'rishmoqda. Tez orada mamlakatimizga etib kelishadi, inshoalloh.

Alloh taolo xorijdagi qorilarimizni hifzu himoyasida asrab, safarlarini bexatar qilsin, vatanimiz dovrug'ini ko'targan, xalqimizning ilmu zakovatini ko'rsatgan qorilarimiz ko'payaversin!

O'zbekiston musulmonlari idorasi matbuot xizmati