O'zbekiston Respublikasi Prezidenti Shavkat Mirziyoev «Ramazon hayitini nishonlash to'g'risida»gi Qarorini imzoladi. Unga ko'ra, 2021 yil muborak Ramazon hayitining birinchi kuni shu yil 13 may kuniga to'g'ri kelishi haqidagi O'zbekiston musulmonlari idorasining axboroti ma'lumot uchun qabul qilingan.

O'zbekiston musulmonlari idorasi ulamolari tomonidan Islom dini manbalari va astronomik ma'lumotlarga tayangan holda 2021 yilda Ramazon hayitining birinchi kuni shu yil 13 may, payshanba kuniga to'g'ri kelishi haqida xulosa qilingan.

Qarorga ko'ra, O'zbekiston musulmonlari idorasining 2021 yilda Ramazon hayitining birinchi kuni 13 may — payshanba kuniga to'g'ri kelishi haqida qabul qilgan qarori inobatga olinib, mamlakatimizda 2021 yil 13 may Ramazon Hayiti bayrami sifatida nishonlanishi belgilandi.

Shuningdek, Prezidentning 10 maydagi PF-6222-sonli Farmoni asosida 2021 yil 14 may (juma) hamda 15 may (shanba) kunlari qo'shimcha dam olish kuni deb e'lon qilindi.

Bundan kelib chiqib, o'zbekistonliklar Ramazon Hayiti munosabati bilan ketma-ket 4 kun dam oladigan bo'lishdi:

13 may, payshanba — Ramazon Hayitining birinchi kuni (ishlanmaydigan bayram kuni);
14 may, juma — qo'shimcha dam olish kuni (barcha uchun);
15 may, shanba — qo'shimcha dam olish kuni (barcha uchun);
16 may, yakshanba — umumiy dam olish kuni.

O'zbekiston musulmonlari idorasi Matbuot xizmati