Kecha, 6 may kuni Saudiya Arabistoni podsholigining mamlakatimizdagi elchixonasi vakillari hamda Vaqf xayriya jamoat fondi rahbari Yahyo qori Ubaydulloh o'g'li bilan samimiy uchrashuv bo'lib o'tdi.

Uchrashuv poytaxtimizdagi "Hazrati Imom" majmuasidagi "Mo'yi muborak" muzeyida bo'lib o'tdi. Dastlab mehmonlar muzeyda joylashgan "Hazrati Usmon mushafi"ni ziyorat qilishdi.

Shundan so'ng tomonlar o'zaro hamkorlik va birdamlikda qilinayotgan xayriya tadbirlari va ularning davomiy bo'lishligi haqida so'z yuritishdi.

Tadbir davomida elchixona vakillari Saudiya Arabistonida chop etilgan Qur'oni karimning 20 000 nusxasini Vaqf xayriya jamoat fondiga beg'araz taqdim etdi. Buning uchun Fond rahbari Yahyo qori Ubaydulloh o'g'li mehmonlarga chuqur minnatdorlik izhor etib, bu kabi xayriyalarda hamkorlik qilishdan mamnun ekanligi bildirdi.

O'zbekiston musulmonlari idorasi matbuot xizmati