O'zbekiston elchisi Ravshan Usmanov «Amanie Group» islom moliyalashtirishi bo'yicha konsalting kompaniyasi asoschisi va Malayziya xalqaro islom universiteti Prezidenti (International Islamic University Malaysia – IIUM) Mohd Daud Bakar bilan muzokaralar o'tkazdi, deb xabar bermoqda "Dunyo"axborot agentligi.

Yig'ilish doirasida «Amanie Group» kompaniyasini O'zbekistonda islom moliyalashtirilishi tamoyillarini amalga oshirishga jalb qilish, jumladan, zarur huquqiy asosni yaratish, shuningdek, IIUM bilan birgalikda ushbu sohada o'zbek mutaxassislarini tayyorlashni tashkil etish masalalari muhokama qilindi.

Ma'lumot uchun, Mohd Daud Bakar, shuningdek, Malayziya Markaziy banki (Bank Negara Malaysia), Malayziya qimmatli qog'ozlar komissiyasi (the Securities Commission of Malaysia), Labuan moliyaviy xizmatlar boshqarmasi ((Labuan Financial Services Authority) va First Abu Dhabi Bank banki Shariat kengashlari raisi hisoblanadi.

2000 yilda tashkil etilgan «Amanie Group» kompaniyasi tegishli normativ-huquqiy bazani rivojlantirish, shu jumladan, islom moliyalashtirishi vositalarini amalga oshirish bo'yicha tajribaga ega. Bu yo'nalishda Qozog'iston va Afg'onistonda ishlar amalga oshirildi. «Amanie Group» Birlashgan Arab Amirliklari, Buyuk Britaniya va Qozog'istonda o'z vakolatxonalariga ega.

IIUM islom bankingi sohasida mutaxassislar tayyorlash bo'yicha etakchi universitet hisoblanadi. U 1983 yilda Malayziya hukumati tomonidan tashkil etilgan va Selangor shtatida joylashgan. Universitetda tahsil olayotgan talabalarning umumiy soni 117 mamlakatdan 26 ming talabani tashkil etadi. Universitet Malayziya bo'ylab 6 ta filiallariga ega. Universitetda 13 fakul'tetlardagi bakalavrlik, magistratura va doktorantura dasturlarini o'z ichiga oluvchi o'qitishning to'liq tsikli amalga oshiriladi.

IIUM kurslari ingliz va arab tillarida o'qitiladi. IIUM islom huquqi sohasida keng kutubxonaga ega. Umumiy kollektsiya 550 ming monografiya, 1,6 ming bosma nashr, 60 ming audiovizual materiallardan iborat.

Muzokaralar natijasida mamlakatimizda islom bankingi vositalarini joriy etish sohasida O'zbekiston Markaziy banki va «Amanie Group» kompaniyasi o'rtasida sheriklik munosabatlarini o'rnatish bo'yicha kelishuvga erishildi.

O'zbekiston musulmonlari idorasi matbuot xizmati