Oliy Majlis Senatining Halqaro munosabatlar, tashqi iqtisodiy aloqalar, xorijiy investitsiyalar va turizm masalalari qo'mitasi Turizm va sport vazirligi bilan birgalikda «Ziyorat turizmini rivojlantirishning dolzarb masalalari» mavzusida xalqaro davra suhbati o'tkazdi, deb xabar bermoqda «Dunyo» AA.

Parlament yuqori palatasi ma'lum qilishicha, davra suhbatida ishtirokchilarga O'zbekistonda turizm sohasini rivojlantirishning qonunchilik va institutsional asoslari, yurtimizda ziyorat turizmini rivojlantirish bo'yicha amalga oshirilayotgan ishlar bo'yicha ma'lumot berildi.

O'zbekistonni Islom tsivilizatsiya markazi sifatida targ'ib qilishning ahamiyati, ziyorat turizmini tashkil etishda logistika masalalari va yangi yo'nalishlar hamda COVID-19 pandemiyasi davrida turizm sohasida faoliyat yuritish shartlari kabi mavzularda taqdimotlar o'tkazildi./

2021 yilda Imom Buxoriy xalqaro ilmiy-tadqiqot markazi tashkil etadigan tadbirlar, Mir Arab madrasasi tashkil etilganligining 500 yilligiga bag'ishlangan xalqaro anjumanga tayyorgarlik, Termiziy ulamolarning islom tamadduni va jahon tsivilizatsiyasiga qo'shgan hissasiga oid anjumanga tayyorgarlik ishlari tadbir ishtirokchilarida katta qiziqish uyg'otdi.

Halqaro forum doirasida Frantsiya, Malayziya, Rossiya, Ozarbayjon kabi xorijiy mamlakatlar mutaxassislari ham so'zga chiqib, xorij tajribasi hamda O'zbekistonda ziyorat turizmini rivojlantirishga oid fikrlarini bilan o'rtoqlashdi.

O'zbekiston musulmonlari idorasi matbuot xizmati