Germaniyaning O'zbekistondagi elchixonasi ijtimoiy tarmoqlardagi sahifalarida me'morchilik sohasida nemis va o'zbek mutaxassislari ishtirokida seminar o'tkazilishi to'g'risida e'lon berdi, deb xabar bermoqda “Dunyo” AA.

Elchixona ma'lumotiga ko'ra, seminarda Potsdam universiteti professori, doktor Shteffen Laue "Me'moriy yodgorliklarni barqaror saqlash kontseptsiyasi asoslariga tahliliy yondashuv" mavzusida ma'ruza qiladi.

Ta'kidlanganidek, Germaniyaning O'zbekiston bilan hamkorlik aloqalari ko'plab sohalarda, jumladan, me'morchilik sohasida ham rivojlanib kelmoqda. Sohada ikki mamlakat mutaxassislari o'rtasida muntazam tarzda qo'shma onlayn kurslar tashkil etilmoqda.

Nemis mutaxassisining me'moriy yodgorliklarni saqlash va qayta tiklashga bag'ishlangan birinchi ma'ruzasi Zoom orqali videokonferentsaloqa shaklida 28 aprel' kuni bo'lib o'tadi.

Mazkur tadbir asosan Potsdam kasb-hunar institutining sherik universitetlari bo'lgan Toshkent, Samarqand va Buxoro universitetlarining arxitektura, qurilish muhandisligi, me'moriy yodgorliklarni konservatsiyalash va qayta tiklash sohasida tahsil olayotgan talabalari va shu sohada ta'lim berayotgan o'qituvchilar uchun mo'ljallangan.

Aytish joizki, ushbu tadbir Germaniya akademik almashinuv xizmati (DAAD) tomonidan moliyalashtirilayotgan "Arxitektura yodgorliklarini kompleks tarzda saqlash" loyihasining bir bo'lagidir.

Seminar yakunida tadbir ishtirokchilari o'zlarini qiziqtirgan savollarni malakali mutaxassislarga berishi mumkin.

O'zbekiston musulmonlari idorasi matbuot xizmati