Bashariyat tarixidan ma'lumki, inson o'zining halol mehnati bilan obro'-e'tiborga, ulug'lik martabasiga erishadi. Halqimizning “Mehnat insonni ulug'laydi” iborasiga hamohang bu hikmatli so'zlarning amaliy tasdig'i Yangi O'zbekistonda yanada yaqqol namoyon bo'lmoqda. Mamlakatimiz ravnaqi, elimiz farovonligi yo'lida fidokorona mehnat qilgan ko'plab yurtdoshlarimiz davlatimizning yuksak unvon, medal' hamda ordenlari bilan mukofotlangani ham shundan dalolat beradi.

Muhtaram Prezidentimizning 2016 yil 28 dekabrda “O'zbekiston faxriylarni ijtimoiy qo'llab-quvvatlash “Nuroniy” jamg'armasi faoliyatini yanada takomillashtirish chora-tadbirlari to'g'risida”gi Farmonlari qabul qilingan edi. Mazkur farmonga muvofiq, “Mehnat faxriysi” ko'krak nishoni ta'sis etilgan edi. 2021 yil 26 aprel' kuni matbuotda ushbu mukofot bilan taqdirlanganlar ro'yxati e'lon qilindi.
Mukofotlanganlar orasida:

- O'zbekiston musulmonlari idorasi raisi, muftiy Usmonxon Alimov hazratlari birinchi darajali;

- Toshkent shahridagi “Burhoniddin Marg'iloniy” jome masjidi imom-xatibi Abdulxamid domla Tursunov, Toshkent viloyatidagi “Hasanboy ota” jome masjidi imomi Yahyo qori Turdiyev, Buxoro viloyatidagi “Bahouddin Naqshband” jome masjidi imom-xatibi Abdug'ofur domla Razzoqov ikkinchi darajali;

- Samarqand viloyati Urgut tumani bosh imom-xatibi Shodi domla Haqberdiyev uchinchi darajali “Mehnat faxriysi” ko'krak nishoni sohibi bo'ldilar.

O'zbekiston musulmonlari idorasi Ulamolar Kengashi a'zolari ushbu yuksak mukofot bilan avvalo, muftiy Usmonxon Alimov hazratlarini, taniqli ulamolarimizni samimiy muborakbod etadilar.

Mazkur fazilatli ulamolarmizga Alloh taboraka va taolodan din, xalq va Vatan yo'lidagi xizmatlarida ulkan muvaffaqiyatlar bardavom bo'lishini tilaymiz, mustahkam sog'liq, uzoq umr va oilaviy baxt yor bo'lishini so'raymiz!

O'zbekiston musulmonlari idorasi