Millatlar, irqlar, dinlararo munosabatlarda barcha dinlarning ezgulik manbai ekanligini anglata bilish muhim ahamiyat kasb etadi. Shu munosabat bilan, joriy yil 27 aprel' kuni O'zbekiston xalqaro islom akademiyasida Vazirlar Mahkamasi huzuridagi Din ishlari bo'yicha qo'mita tomonidan “Markaziy Osiyo mamlakatlarida diniy erkinliklar” mavzusida mintaqaviy video-konferentsiya tashkil etildi.

Muloqotda Adliya vazirligi, O'zbekiston Respublikasi Prezidenti huzuridagi Strategik va mintaqalararo tadqiqotlar instituti, Vazirlar Mahkamasi huzuridagi Din ishlari bo'yicha qo'mita, Inson huquqlari bo'yicha milliy markaz, O'zbekiston xalqaro islom akademiyasi, O'zbekiston musulmonlari idorasi va turli diniy konfessiya vakillari ishtirok etdi. Shuningdek, Qozog'iston, Qirg'iziston va Tojikiston vakillaridan iborat ekspertlar qatnashdilar.

Anjumanda O'zbekistonda diniy bag'rikenglik va konfessiyalararo hamjihatlikni qaror toptirish, fuqarolarning e'tiqod erkinligini ta'minlashning huquqiy asoslarini mustahkamlash borasidagi ijobiy ishlar alohida e'tirof etildi. Shuningdek, diniy konfessiya vakillariga bo'lgan e'tibor yildan-yilga oshib, bu, ayni paytda, O'zbekistonning barcha sohadagi islohotlarida o'z aksini topayotgani, xususan, “2017-2021 yillarda O'zbekiston Respublikasini rivojlantirishning beshta ustuvor yo'nalishi bo'yicha Harakatlar strategiyasi”ning beshinchi yo'nalishi, aynan, diniy bag'rikenglik va millatlararo totuvlikni ta'minlash masalasiga bag'ishlangani ham buning yorqin namunasi ekani qayd etildi.

Horijiy va mahalliy olimlar, professor-o'qituvchilar, soha vakillari ishtirokida qizg'in muhokamalarga boy bo'lgan konferentsiyada O'zbekistonda diniy bag'rikenglikni qaror toptirishning siyosiy-huquqiy aspektlari, fuqarolar e'tiqod erkinligi va huquqini ta'minlashning asoslari ham muhokama etildi.

Ta'kidlash kerakki, yurtimizdagi insonparvarlik siyosati natijasida jamiyatda dinlar, millatlararo totuvlik va barqarorlikni ta'minlash, konfessiyalararo muloqot madaniyatini rivojlantirishda diniy tashkilotlar bilan o'zaro uzviy munosabat shakllangan. O'zbekistonning diniy bag'rikenglik va konfessiyalararo hamjihatlikni qaror toptirish, fuqarolarning e'tiqod erkinligi va huquqini himoya qilish borasidagi tajribasi yildan-yilga ijobiy ahamiyat kasb etib bormoqda.

Bu kabi konferentsiyalar esa ushbu yo'nalishdagi ishlarni mintaqaga tarannum etishda katta ahamiyat kasb etishi, shubhasiz.

Din ishlari bo'yicha qo'mita

Axborot xizmati