Saudiya Arabistonining ko'chmas mulk ob'ektlariga investitsiya kirituvchi yirik kompaniyalari vakillari bilan onlayn muloqot o'tkazildi, deb xabar bermoqda “Dunyo” AA.

Tadbirda O'zbekiston investitsiyalar va tashqi savdo vazirligi, Saudiya Arabistoni milliy kompaniyalarni qo'llab-quvvatlash agentligi, ikki mamlakat kompaniyalari vakillari, mamlakatimiz elchixonasi xodimlari qatnashdi.

Onlayn tadbirda mamlakatimiz, jumladan, Toshkent shahri ko'chmas mulk bozorida so'nggi yillarda amalga oshirilayotgan o'zgarishlar, mahalliy va xorijiy tadbirkorlarga yaratilayotgan qulay sharoitlar haqida ma'lumot berildi, saudiyalik investorlarga ushbu sohada hamkorlik qilish bo'yicha loyihalar taqdim qilindi.

O'z navbatida, saudiyalik investorlar joriy yil yanvar' oyida O'zbekistonga qilgan safarini mamnuniyat bilan eslab, mamlakatimizda guvohi bo'lgan yangilanishlar jarayoni va yaratilayotgan biznes imkoniyatlarlan ruhlanganini ta'kidladi.

Ularning fikricha, O'zbekiston Markaziy Osiyoda eng ko'p biznes imkoniyatlarga ega davlatga aylanmoqda. Tadbirkorlar tijorat, mehmonxona, turizm va boshqa ko'p maqsadli investitsion ko'chmas mulk ob'ektlarini qurishni rejalashtirayotganini aytdi.

Muloqotda turizm sohasiga oid ob'ektlar qurilishiga alohida e'tibor berish zarurligi qayd etildi. Bugun Saudiya Arabistonida O'zbekistonga bo'lgan qiziqish ortib bormoqda va bu keyingi yillarda ushbu mamlakatdan turistlar oqimi o'sishiga xizmat qilishi qayd etildi.

Tomonlar o'zaro aviaqatnovlar ko'lamini kengaytirish istiqbollarini ham muhokama qildi.
O'z navbatida, Saudiya Arabistoni tomoni xorijiy investorlarga ajratilgan er uchastkalarining joylashishiga katta ahamiyat berishini, O'zbekiston hukumati esa ko'proq sayyohlik ob'ektlarining qurilishiga imkon berishini ta'kidladi.

Bunga sabab suhbatdoshlarning fikricha, yaqin yillarda Saudiya Arabistoni O'zbekistonga yiliga 100 ming, hozirgi kunda esa – yiliga 1-2 ming sayyoh yuborish imkoniga ega.

O'zbekiston musulmonlari idorasi matbuot xizmati