Frantsiyaning ommabop «GEO» sayyohlik nashri «My Tour Live» kompaniyasi bilan hamkorlikda frantsuz sayohatchilari uchun navbatdagi jonli virtual ekskursiyani tashkil etish uchun Samarqand shahrini tanladi, deb xabar bermoqda «Dunyo» AA.

Registon maydoniga virtual tashrif 23 aprel', juma kuni soat 20:30 dan 21:30 gacha rejalashtirilgan.

Nashr «Karantin choralari va sayohatlarni cheklashni vaqtincha unutishni, klavishlarni bir necha marta bosish orqali Markaziy Osiyodagi mamlakat va Ipak yo'lidagi ulug'vor joy – O'zbekistonga borishni» taklif qilgan.

Hayajonli virtual sayohatga tajribali gid hamrohlik qiladi. U ushbu manzil sirlarini ochishdan tashqari, real vaqtda batafsil ma'lumot berish bilan birga, barcha savollarga javob beradi. Bu Samarqand ko'chalarida sayr qilish uchun jonli ravishda taqdim etilgan haqiqiy ekskursiyadir.
«Samarqanddagi Registon maydoni – Markaziy Osiyodagi eng go'zal joylardan biridir. Buyuk ipak yo'li davrida Registon dunyodagi eng yirik savdo chorrahasi bo'lgan. XV asrdan buyon bu erda uchta madrasa, masjid va saroylar bunyod etilgan. Ular sehrli moviy ranglar bilan qoplangan oltin hattotlik gumbazlari bilan bezatilgan», deb xulosa qiladi «GEO» .

O'zbekiston musulmonlari idorasi matbuot xizmati