21 aprel' kuni O'zbekistonning Malayziyadagi elchixonasi «The Malaysia International Halal Showcase – MIHAS» 17-Halqaro halol mahsulotlar ko'rgazmasida ishtirok etish uchun onlayn ro'yxatdan o'tish marosimida ishtirok etdi, deb xabar bermoqda «Dunyo» AA.

Har yili ushbu tadbirda dunyoning 40 mamlakatidan mingga yaqin kompaniya ishtirok etadi va 80 davlatdan 25 mingdan ziyod odam tashrif buyuradi.
Bu yilgi ko'rgazma 9-12 sentyabr' kunlari Malayziya Halqaro savdo va ko'rgazma markazida (MITEC) o'tkazilishi rejalashtirilgan. Malayziya MIHAS-2021 ko'rgazmasining ishtirokchisi sifatida ro'yxatdan o'tish va o'z mahsulotlarini namoyish qilish uchun tegishli onlayn va oflayn platformalar bilan ta'minlash maqsadida O'zbekiston korxonalari bilan hamkorlik qilishga tayyorligini ma'lum qildi.

Ma'lumot uchun, MIHAS dunyodagi eng yirik halol mahsulotlarga bag'ishlangan tadbir bo'lib, u 2004 yildan beri o'tkazib kelinmoqda. Ko'rgazma tashkilotchilari - Malayziya xalqaro savdo va sanoat vazirligi, tashqi savdoni rivojlantirish korporatsiyasi hamda yirik xalqaro ko'rgazmalar va boshqa tadbirlarni tashkil qilish bo'yicha qariyb 30 yillik tajribaga ega bo'lgan «HW Lima Sdn Bhd» kompaniyasidir.

Ushbu tadbirda o'zbek kompaniyalarining faol ishtirok etishi mamlakatimizda tayyorlangan mahsulotlarning xorijiy davlatlar bozorlariga eksportini yanada oshirishga xizmat qiladi.

O'zbekiston musulmonlari idorasi matbuot xizmati