Hiva shahrining «Ichan qal'a» muzeyidan qadimiy quduq topildi. Bu haqda Fanlar akademiyasi axborot xizmati xabar berdi.

Ma'lum qilinishicha, 19 aprel' kuni Hiva shahrining «Ichan qal'a» davlat muzey qo'riqxonasi hududidagi ta'mirlash ishlari chog'ida yopib tashlangan quduq og'zi ochilgan. Biroq uning noan'anaviy ko'rinishi turli farazlarga sabab bo'lmoqda.

U boshqa suv quduqlari kabi pastdan tepaga torayib ketmasdan, uning barcha qismida diametri bir xil, ya'ni 2,6 metrni tashkil qilgan. Chuqurligi 5,6 metrga teng. Qadimgi an'anaga ko'ra quduqning asosi, ya'ni poydevor qismiga Horazm sharoitida ko'p uchrovchi daraxt, tut yoki gujumdan yog'och poydevor o'rnatilgan. Yog'ochning qalinligi 16 santirmetr atrofida bo'lgan.

Shuningdek, quduq devorlariga 25x25x6 santirmetr o'lchamdagi pishgan g'isht bilan terilgan. G'ishtlar yuzasida rombsimon belgilar mavjud. Quduq taxminan bundan 100-150 yil oldin qurilgan. Mazkur quduqdan aynan nima maqsadda foydalanilgani masalasi ilmiy jihatdan o'rganilmoqda.

O'zbekiston musulmonlari idorasi matbuot xizmati