Qur'on tilovatlari kishilarni masjidlarga chorlamoqda
Ikkinchi yildirki, karonavirus xastaligi butun dunyoga tashvish solib turibdi. Ayni kunlarda ham bu kasallik yanada avj olgan. Jahonning aksariyat davlatlari qattiq karantin holatiga qaytmoqda. Jumladan, qo'shni mamlakatlarda ham ushbu holat kuzatilyapti.
Yurtimizda esa hukumatimiz tomonidan xalqimiz sog'lig'ini asrash yo'lida jiddiy sa'y-harakatlar amalga oshirilmoqda. Aholi navbati bilan karonavirusga qarshi emlanyapti. Lekin kasallanish holatlari to'xtagani yo'q. Shunday bo'lishiga qaramay, masjidlarimizda muborak ramazon oyining taroveh namozlari o'qilmoqda, xatmi Qur'on o'tkazilmoqda. Albatta, bu yurtdoshlarimiz uchun katta imkoniyat va baxtdir. Biz ham taroveh namozlarida tibbiy niqob taqib, oraliq masofani saqlashimiz, qo'l berib ko'rishmasligimiz kerak.
Bugun karantin holatiga kirgan davlatlarda odamlar ko'chaga ham chiqolmay qiynalishmoqda. Ta'lim muassasalari, turli tashkilot va idoralar faoliyati onlayn rejimiga o'tgan. Shu davlatlarda yashayotgan musulmonlar esa taroveh namozlari, xatmi Qur'onlarni sog'inishmoqda. Shu ma'noda, biz shunday baxtga musharraf qilgani uchun Alloh taologa shukurlar aytishimiz kerak. Namozlarimizda esa yurtimiz tinchligi, karonavirus kasalligi tezroq xalqimiz boshidan arishini Yaratgandan so'rab duoi iltijolar qilsak, har jihatdan maqsadga muvofiq bo'ladi.
Masjidlarimiz namozxonlarga to'lib, o'zgacha tarovat kasb etmoqda. Muazzinu qorilarning diltortar tilovatlari esa, mo'min-musulmonlarning qalbiga inib, tavba-tazarru hamda shukronalik hislarini uyg'otmoqda. Bir so'z bilan aytganda, muazzam Ramazon oyi kishilarni som'e va xushu bilan ibodat qilishga undamoqda. Zotan, Payg'ambarimiz sallolohu alayhi vasallam: “Kim ramazon kechalarida turib, ibodat qilish sunnatligiga ishonib, savob umid etib ibodat qilsa, oldingi gunohlari kechiriladi” (Abu Hurayradan rivoyat qilingan), deganlar. Alloh taolo hammamizni ana shunday saodatga musharraf etsin.
O'zbekiston Musulmonlari idorasi
Matbuot xizmati
O‘zbekistonda jahon xattotlar tanlovi 26 avgustda e’lon qilinadi
O‘zbekistonda noyob Qur’on yaratish bo‘yicha jahon xattotlar tanlovi 26 avgust kuni O‘zbekistondagi Islom sivilizatsiyasi markazida e’lon qilinadi. Tanlov «Islom sivilizatsiyasi: yangi nigoh — yangi kashfiyotlar» xalqaro mediaforumi doirasida o‘tkaziladi, xabar bermoqda UzDaily.uz.
«Dunyo Qur’oni: xattotlik an’analaridan — kelajak merosi sari» loyihasini xattot va Islom sivilizatsiyasi markazi huzuridagi Xattotlik maktabi direktori Habibullo Solih taqdim etadi. Bu haqda tadbir tashkilotchisi xabar berdi.
Tanlov doirasida turli mamlakatlar va xattotlik maktablarining islomiy xattotlikdagi eng yaxshi an’analarini birlashtirgan noyob Qur’on yaratish ko‘zda tutilgan.
Tanlovning tantanali e’loni «Asrlarni birlashtiruvchi meros. Islom sivilizatsiyasining ma’naviy mazmunlari» mavzusidagi yalpi sessiyaning yakuniy qismi bo‘ladi. Sessiya 26 avgust kuni soat 09:30 dan 12:00 gacha o‘tkaziladi.
Tadbir doirasida ommaviy axborot vositalarining stereotiplar va islomofobiyani yengishdagi roliga bag‘ishlangan xalqaro muhokama ham bo‘lib o‘tadi. Unda Islom hamkorlik tashkiloti, Jazoir, Ummon, Pokiston, Saudiya Arabistoni, Iroq, Mali va O‘zbekistonning davlat tuzilmalari hamda OAV vakillari ishtirok etadi.
Forum dasturidan Qur’oniy va qo‘lyozma merosga bag‘ishlangan loyihalar ham o‘rin olgan. Ular orasida «114 Qur’on: islom olamining 114 xattotlik durdonasi», «Katta Langar Qur’oni: haqiqat va rivoyatlar» xalqaro loyihasi hamda «Sun’iy intellekt — qadimiy qo‘lyozmalarni o‘qishning raqamli kaliti» loyihasi bor.
O‘zbekistonda xattotlikni rivojlantirishga institutsional darajada ham e’tibor qaratilmoqda. Islom sivilizatsiyasi markazi huzurida Prezident Shavkat Mirziyoyev tashabbusi bilan tashkil etilgan Xattotlik maktabi faoliyat yuritmoqda. Maktabda suls, nasx, nasta’liq, ruq’a, devoniy va kufiy kabi an’anaviy yozuv uslublarini o‘rgatish rejalashtirilgan.
Xattotlik san’ati Samarqand viloyatidagi yangi Imom al-Buxoriy majmuasida ham namoyon etilgan. Majmua peshtoqlari va ayvonlari devorlari «Sahih al-Buxoriy»dan olingan hadislar bitilgan yozuvlar bilan bezatilgan. Majmua huzurida Imom Buxoriy xalqaro ilmiy-tadqiqot markazi va Hadis ilmiy maktabi ham faoliyat yuritadi.
Xalqaro mediaforumning asosiy maydoni O‘zbekistondagi Islom sivilizatsiyasi markazi bo‘ladi.
Tadbirda qariyb 50 mamlakatdan media va ekspertlar hamjamiyatining 300 ga yaqin vakili ishtirok etadi. Ular orasida mediakompaniyalar, axborot agentliklari va telekanallar rahbarlari, jurnalistlar, prodyuserlar, olimlar hamda kreativ industriya mutaxassislari bor.
O‘zbekiston musulmonlari idorasi matbuot xizmati
