O'zbekistonning Tehrondagi elchixonasida Eron Fors tili va adabiyoti akademiyasi raisining o'rinbosari Muhammad Nassiri, Islom hamkorlik tashkiloti Ilmiy-texnik hamkorlik qo'mitasi (COMSTECH) huzuridagi Islom universitetlari aro virtual tarmoq (CINVU) Bosh kotibi Karim Barzegar Najafiy bilan uchrashuv o'tkazildi, deya xabar bermoqda «Dunyo» AA.

Tadbirda Muhammad Nassiri Tehron shahridagi “Guliston saroyi” muzeyida saqlanayotgan «Boburnoma» qo'lyozmasining kseronusxasini O'zbekistonning Erondagi diplomatik vakolatxonasi rahbari Bahodir Abdullayevga topshirdi.

Suhbatdosh ushbu qo'lyozma noyob va dunyoda o'xshashi yo'qligini ta'kidladi. U nastaliq uslubida yozilgan va ko'plab taniqli boburshunoslar uning o'ziga xosligi va ahamiyatini tasdiqlaydi.

Ba'zi ma'lumotlarga ko'ra, qo'lyozma Bobur tirikligi davrida ko'chirilgan bo'lishi mumkin. Kitob qo'ldan qo'lga o'tib, Eronga kajarlar sulolasi vakillaridan Nasriddin Shox Kajar (1848-1896) davrida kelib qolgan. Asar so'nggi 150 yil davomida “Guliston saroyi” muzeyida saqlanib kelinmoqda.

Uchrashuvda Muhammad Nassiri may oyining o'rtalarida o'zbek boburshunoslari bilan tajriba almashish, «Boburnoma» haqida tayyorlanayotgan kitobini yangi materiallar bilan to'ldirish uchun O'zbekiston fondlarida saqlanayotgan qo'lyozmalar bilan tanishish maqsadida mamlakatimizga kelishni rejalashtirayotganini ma'lum qildi.

O'zbekiston musulmonlari idorasi matbuot xizmati