Nur Sulton hokimligi saytining xabar berishicha, Qozog'iston Respublikasida Markaziy Osiyodagi eng katta masjid qurilish jarayonidan olingan fotosuratlar e'lon qilindi. Bu haqda tengrinews.kz. nashri xabar berdi. Mamlakat poytaxtida Kabanbay botir va Mangilik el xiyobonlari oralig'ida yangi masjid qurilmoqda. Nur Sulton hokimi Oltoy Kulginov o'zining instagram sahifasida ushbu masjid Qozog'iston va Markaziy Osiyodagi eng yirik maskanga aylanadi, deya ma'lumot yozib qoldirgan.

Masjid gumbazining balandligi deyarli 90 metr, minoralar esa 130 metr balandlikda quriladi. Masjidning sig'imi 30 ming kishini tashkil qiladi. Hokimning ta'kidlashicha, qurilish Nursulton Nazarboyev nomidan homiylik mablag'lari hisobiga amalga oshirilmoqda.

«Bugun men masjid qurilish jarayoni bilan yaqindan tanishib chiqdim. O'z navbatida biz muhandislik tarmoqlari va kommunikatsiyalar ustida ish olib bormoqdamiz. Jumladan, masjid hududi obod qilinadi va daraxtlar ekiladi. Kelajakda masjid nafaqat mamlakatimiz aholisiga, shuningdek, sayyohlar uchun ham diqqatga sazovor joylarga aylanadi», deydi Kulginov.

Hurshid Ma'ruf tayyorladi