Agar bu sizning oxirgi Ramazoningiz bo'lsa...
Yana bir Ramazongacha – rahmat va mag'firat oyigacha yashashimizga imkon bergan Allohga hamdlar bo'lsin.
Keling, bu oyni oxirat hayoti uchun ko'proq foyda bilan o'tkazishga harakat qilaylik, chunki ehtimol kimdir uchun bu oxirgi ramazon ham bo'lishi mumkin.
Ramazon - bu boshidan boshlash, tavba qilish va hayotingizni o'zgartirish uchun imkoniyat.
Agar siz Qur'on o'qishni, tinglashni yoki yodlashni, qo'shimcha ibodat qilishni, tunlaringizni ibodat bilan o'tishini, Allohni ko'proq zikr qilishni istasangiz o'sha ishingizni shu muborak oydan boshlang!
Ushbu imkoniyatni qo'ldan boy bermang!
Alloh bu oyni bizdan rozi bo'ladigan tarzda o'tkazishimizga yordam bersin!
O'tgan Ramazonda biz bilan birga bo'lgan qancha do'st va yoronlarimiz, ustozlarimiz bugun qabrlardan joy olishgan.
O'lim to'satdan keladi va o'limdan keyin hech kim bu dunyoga qaytmaydi.
«Toki qachon ulardan (ya'ni mushriklardan) biriga o'lim kelganida:
«Parvardigor, meni (yana hayotga) qaytaringlar. Shoyad, men qolgan umrimda yaxshi amal qilsam», deb qolur. Yo'q! (U aslo hayotga qaytarilmas). Darhaqiqat bu (har bir jon berayotgan kofir) aytadigan so'zdir. Ularning ortida to qayta tiriladigan kunlarigacha (dunyoga qaytishlaridan to'sib turadigan) bir to'siq bo'lur». (Mo'minun, 99-100 oyatlar).
O'limdan keyin bu dunyoga qaytishning iloji yo'q, lekin hamma: agar u gunohkor bo'lsa - tavba qilish va agar u yaxshilik qiladiganlardan bo'lsa - yaxshi amallar sonini ko'paytirish uchun xohlaydi.
Agar bu Ramazondan keyin vafot etsak-chi?
Biz yana ro'za tutish uchun qaytib kelishni, qabrda va oxiratda bizga ko'proq foyda keltiradigan amallarni bajarishni xohlamaymizmi?!
O'zingizni go'yoki o'limdan keyin yana hayotga qaytgandek tasavvur qiling! Qaytib kelganingiz, shu oyda hayotingizni yaxshilash uchun, ilgari yo'qotganlaringizni qoplash uchun, Qiyomat kuni tarozida og'ir keladigan savob ishlarni bajarish uchun yana bir imkoniyatga ega ekanligingizni o'ylab ko'ring...
Allohdan bizni gunohlarimizdan poklashni, tavbamizni qabul qilishini va yaxshilik qilganlarning ajrini ziyoda qilishni so'raymiz.
Yoqub Umar
"Imom Buxoriy" ordeni — yuksak ehtirom ramzi!
Kuni kecha mamlakatimiz mustaqilligining 35 yilligi munosabati bilan muhtaram Prezidentimiz tomonidan yuksak davlat mukofotlariga sazovor bo‘lgan bir guruh vatandoshlarimiz taqdirlandi.
Eng quvonchlisi shuki, tadbirda diniy-ma’rifiy sohada fidokorona xizmat qilib kelayotgan, xalqimizning ma’naviy yuksalishiga beqiyos hissa qo‘shayotgan taniqli ulamolarimiz va faxriylarimizning zahmatli mehnatlari yuksak darajada e’tirof etildi!
Xususan, Diniy idora tizimida uzoq yillardan beri samarali xizmat qilib kelayotgan ustozlardan O‘zbekiston musulmonlari idorasi raisining birinchi o‘rinbosari Homidjon domla Ishmatbekov, O‘zbekiston musulmonlari idorasi Faxriylar kengashi raisi Shayx Abdulaziz Mansur, Samarqand viloyati Payariq tumani "Imom al-Buxoriy" jome masjidi faxriy imomi Mahmudjon domla Ibodullayev, Buxoro viloyati Kogon tumani "Bahouddin Naqshband" jome masjidi imom-xatibi Abdug‘ofur domla Razzoqov "Imom Buxoriy" ordenini Davlatimiz Rahbaridan qabul qilib olishdi.
Ustozlarning ilmiy-ma’rifiy faoliyati, xalq ichida ma’rifat ulashishdagi fidoyiliklari davlatimiz tomonidan yuksak qadrlangani butun diniy-ma’rifiy sohada mehnat qilayotganlar uchun katta faxr va sharafdir.
Ushbu voqea Yangi O‘zbekistonda diniy-ma’rifiy sohaga, milliy qadriyatlarimizni avaylab-asrash hamda rivojlantirishga qaratilayotgan izchil va xayrli siyosatning amaliy ifodasidir.
Xalqimizda qadimdan ma’rifat ahlini ulug‘lash, ularning zahmatli mehnatini qadrlash ezgu an’ana sanaladi. Islom ta’limotida ham ilm egalariga alohida maqom va hurmat bilan qaraladi. Zero, Imom Termiziy bobomiz rivoyat qilgan hadisi sharifda: «Ulamolar payg‘ambarlarning merosxo‘rlaridir», deyilgan.
Ulamolarga ko‘rsatilayotgan bunday e’tiborning nechog‘li xayrli ekani quyidagi hikmatda ham o‘z ifodasini topgan. Ulug‘ zotlardan biri Tovus rahmatullohi alayh otasidan quyidagicha rivoyat qilgan: «To‘rt kishini hurmat qilish sunnatdir: olim, yoshi ulug‘ inson, podshoh va ota» (Imom Abdurazzoq rivoyati).
Mazkur yuksak mukofot milliy va diniy qadriyatlarimizni tiklash, Islom ma’rifatini keng targ‘ib etish, jamiyatda bag‘rikenglik va tinchlik-omonlikni bardavom saqlash yo‘lidagi ko‘p yillik xayrli xizmatlarning munosib e’tirofidir.
Davlatimizning bunday e’tibori diniy soha xodimlariga yanada ulkan mas’uliyat yuklaydi, ma’naviy yuksalish yo‘lidagi xayrli xizmatlar ko‘lamini yanada kengaytirishga xizmat qiladi, insha Alloh.
O‘zbekiston musulmonlari idorasi Matbuot xizmati
