O'smirlarni yot g'oyalardan asraylik!
Dunyoning turli hududlarida buzg'unchilik, fitnalar qo'zg'alib, musulmonlar tinchligini buzish, xalq orasida nizo chiqarish va nifoq solishga harakatlar hamon kuzatilyapti.
O'zlarini go'yo “Islom dini va musulmonlarni himoya qiluvchi xaloskor firqa” deb e'lon qilgan kimsalar begunoh musulmonlarning o'limiga sabab bo'lmoqda. Eng yomoni, ular xatti-harakatlarini asoslash uchun oyat va hadislarni o'zlarining qora maqsadi yo'lida ta'vil qilib, musulmonlarni bir-birlariga gij-gijlashmoqda.
Payg'ambarimiz alayhissalom: “Dushman bilan to'qnashishni orzu qilmanglar, balki Allohdan ofiyat so'ranglar” deganlar (Imom Buxoriy rivoyati).
Musulmonlar haqli ravishda hukmdorlik qilayotgan podshoh qo'l ostida tinch va osoyishta yashab turganlarida hukmdorga qarshi bosh ko'targan kishilar bog'iylardir. Bog'iylar toifasining xuruji zulm sababli emas, balki o'zlarini haq, podshohni nohaq deb bilish, hokimiyat talashish maqsadida bo'lsa, bunday to'daga qarshi podshohga yordam berishga har bir imkoniyatli kishi harakat qilishi lozim bo'ladi.
Terrorchi va ekstremistik tuzilmalarning asosiy g'oyasi “jihod” yo'li bilan o'z faoliyatini davom ettirishdir. Bu degani doimiy ravishda qaysidir mamlakat xalqini qurolli hujum orqali majburiy ravishda o'z g'oyalari ta'siriga tortish hamda o'zlariga mos sharoit yaratish maqsad qilingan.
Islom dinini qurol vositasi bilan yoyish davri o'tgan. Endilikda bu g'oyani tatbiq etish maqsadida jangarilarni tayyorlash, harbiy mashqlarni davom ettirish Islom dinini dunyoga manfur qilib ko'rsatishdan boshqa narsa emas. Buning o'rniga tinchlik yo'li bilan Islom dinining qanchalik insonparvar, mehr-shafqatga chaqiradigan, taraqqiyparvar din ekanini amalda namunali tarzda ko'rsatish yo'lini tanlash lozim.
“Mabsut” kitobida yozilishicha, biror mamlakatda, Islom hukmlaridan bittasi joriy bo'lib turgan bo'lsa ham, u dorul islom hukmida qolaveradi.
Ekstremistik ruh bilan yo'g'rilgan qora kuchlar ilohiy manbalarni noto'g'ri talqin qilish orqali o'zlari og'ir gunohlarga borishi bilan birga, dunyodagi ko'pchilik musulmonlarni ham to'g'ri yo'ldan chalg'itadi. Dunyo jamoatchiligiga tashvish orttirish hamda Islomni yovuzlikka chaqiruvchi din timsolida tanitish kabi zararli faoliyatlari bilan ularning o'ta jinoyatkor bandalar qatoridan joy olayotganlari aniq va ravshandir.
Mazkur holatlarni e'tiborga olgan holda hozirgi davrda barcha ulamolar hamkorlikda Islom dini ta'limotlari sofligini saqlash, dinimiz ahkomlarini buzib ko'rsatishga harakat qilayotgan yovuz kuchlarga qarshi ma'rifiy yo'llar bilan kurashishni yanada kuchaytirishlari zarur.
San'atbek TURSUNOV,
Andijon viloyati “Usmoni Zinnurayn” jome masjidi imom-xatibi
O‘zbekistonda jahon xattotlar tanlovi 26 avgustda e’lon qilinadi
O‘zbekistonda noyob Qur’on yaratish bo‘yicha jahon xattotlar tanlovi 26 avgust kuni O‘zbekistondagi Islom sivilizatsiyasi markazida e’lon qilinadi. Tanlov «Islom sivilizatsiyasi: yangi nigoh — yangi kashfiyotlar» xalqaro mediaforumi doirasida o‘tkaziladi, xabar bermoqda UzDaily.uz.
«Dunyo Qur’oni: xattotlik an’analaridan — kelajak merosi sari» loyihasini xattot va Islom sivilizatsiyasi markazi huzuridagi Xattotlik maktabi direktori Habibullo Solih taqdim etadi. Bu haqda tadbir tashkilotchisi xabar berdi.
Tanlov doirasida turli mamlakatlar va xattotlik maktablarining islomiy xattotlikdagi eng yaxshi an’analarini birlashtirgan noyob Qur’on yaratish ko‘zda tutilgan.
Tanlovning tantanali e’loni «Asrlarni birlashtiruvchi meros. Islom sivilizatsiyasining ma’naviy mazmunlari» mavzusidagi yalpi sessiyaning yakuniy qismi bo‘ladi. Sessiya 26 avgust kuni soat 09:30 dan 12:00 gacha o‘tkaziladi.
Tadbir doirasida ommaviy axborot vositalarining stereotiplar va islomofobiyani yengishdagi roliga bag‘ishlangan xalqaro muhokama ham bo‘lib o‘tadi. Unda Islom hamkorlik tashkiloti, Jazoir, Ummon, Pokiston, Saudiya Arabistoni, Iroq, Mali va O‘zbekistonning davlat tuzilmalari hamda OAV vakillari ishtirok etadi.
Forum dasturidan Qur’oniy va qo‘lyozma merosga bag‘ishlangan loyihalar ham o‘rin olgan. Ular orasida «114 Qur’on: islom olamining 114 xattotlik durdonasi», «Katta Langar Qur’oni: haqiqat va rivoyatlar» xalqaro loyihasi hamda «Sun’iy intellekt — qadimiy qo‘lyozmalarni o‘qishning raqamli kaliti» loyihasi bor.
O‘zbekistonda xattotlikni rivojlantirishga institutsional darajada ham e’tibor qaratilmoqda. Islom sivilizatsiyasi markazi huzurida Prezident Shavkat Mirziyoyev tashabbusi bilan tashkil etilgan Xattotlik maktabi faoliyat yuritmoqda. Maktabda suls, nasx, nasta’liq, ruq’a, devoniy va kufiy kabi an’anaviy yozuv uslublarini o‘rgatish rejalashtirilgan.
Xattotlik san’ati Samarqand viloyatidagi yangi Imom al-Buxoriy majmuasida ham namoyon etilgan. Majmua peshtoqlari va ayvonlari devorlari «Sahih al-Buxoriy»dan olingan hadislar bitilgan yozuvlar bilan bezatilgan. Majmua huzurida Imom Buxoriy xalqaro ilmiy-tadqiqot markazi va Hadis ilmiy maktabi ham faoliyat yuritadi.
Xalqaro mediaforumning asosiy maydoni O‘zbekistondagi Islom sivilizatsiyasi markazi bo‘ladi.
Tadbirda qariyb 50 mamlakatdan media va ekspertlar hamjamiyatining 300 ga yaqin vakili ishtirok etadi. Ular orasida mediakompaniyalar, axborot agentliklari va telekanallar rahbarlari, jurnalistlar, prodyuserlar, olimlar hamda kreativ industriya mutaxassislari bor.
O‘zbekiston musulmonlari idorasi matbuot xizmati
