Qorimiz AQShdagi masjidda xatmi Qur'on o'tkazmoqda
Habar berganimizdek, O'zbekiston musulmonlari idorasi muborak Ramazon oyini yuqori saviyada o'tkazish ishlari qizg'in davom etmoqda. Jumladan, xorij davlatlari diniy idoralaridan kelgan takliflar asosida yurtimiz qorilari chet mamlakatlarda taroveh namozlarida Qur'oni karimni xatm qilib berish va diniy-ma'rifiy tadbirlar o'tkazish uchun safarga jo'nab ketishdi.
Jumladan, AQSh dagi Turkiston – Amerika jamiyatining rasmiy taklifiga binoan Toshkent shahridagi “Ahmadjon qori” masjidi imom-xatibi, 2018 yilgi O'zbekiston Qur'on musobaqasi hakamlar hay'ati a'zosi Muhammadiy qori Ergashev AQShga jo'nab ketdi va mutasaddi vakillar tomonidan kutib olindi. Muhammadiy qori Ergashev AQSh da Ramazon oyi davomida musulmonlarga taroveh namozini ado etib, diniy – ma'rifiy suhbatlar o'tkazib beradi.
Ma'lumot uchun, bir necha yillardan buyon imom-domlalarimiz Turkiston – Amerika jamiyati taklifiga ko'ra, Ramazon oyida AQShda bo'lib qaytgan edi. O'tgan 2020 yili pandemiya sabab qorilarimizning xorij safari tashkil etilmadi. Joriy yil Ramazon oyida qorilarimiz AQSh, Rossiya, Ukraina va boshqa mamlakatlarda xatmi Qur'onlar va diniy-ma'rifiy suhbatlar o'tkazib qaytishadi.
Safar tafsilotlari haqida portalimiz orqali xabar berib boramiz, inshoalloh.
O'zbekiston musulmonlari idorasi matbuot xizmati
Bir guruh diniy-ma’rifiy soha fidoyilariga "O‘zbekiston Respublikasi mustaqilligining 35 yilligi" esdalik nishonlari topshirildi
27 avgust kuni O‘zbekiston Respublikasi mustaqilligining 35 yilligi munosabati bilan diniy-ma’rifiy sohada samarali mehnat qilib kelayotgan fidoyi yurtdoshlarimizni taqdirlashga bag‘ishlangan tantanali tadbir bo‘lib o‘tdi.
Tadbirda O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov kirish so‘zi bilan ishtirok etdi.
Kirish nutqida mamlakatimizda mustaqillik yillarida, ayniqsa, so‘nggi yillarda diniy-ma’rifiy sohani rivojlantirish, jamiyatda tinchlik-totuvlik, millatlararo hamjihatlik va diniy bag‘rikenglikni mustahkamlash borasida amalga oshirilayotgan islohotlar, shuningdek, sohada faoliyat yuritayotgan ulamolar, imom-xatiblar, mudarrislar va fidoyi xodimlarning munosib hissasi haqida alohida ta’kidlandi.
Tantanali tadbir davomida diniy-ma’rifiy sohada ko‘p yillardan buyon samarali mehnat qilib, yurtimizda ma’naviy barqarorlikni ta’minlash, yosh avlodni milliy va umuminsoniy qadriyatlar ruhida tarbiyalash, aholi o‘rtasida ma’rifiy tushuntirish ishlarini olib borishga munosib hissa qo‘shib kelayotgan bir guruh fidoyi yurtdoshlarga "O‘zbekiston Respublikasi mustaqilligining 35 yilligi" esdalik nishonlari tantanali ravishda topshirildi.
Esdalik nishonlarini topshirish marosimida O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov, Din ishlari bo‘yicha qo‘mita raisi Sodiq Toshboyev, O‘zbekiston musulmonlari idorasi raisi, muftiy Shayx Nuriddin Xoliqnazar hazratlari, O‘zbekistondagi Islom sivilizatsiyasi markazi direktori Firdavs Abduhalikov, O‘zbekiston Respublikasi Vazirlar Mahkamasi mas’ul xodimi Orifxon Zokirovlar ishtirok etdilar.
Taqdirlash marosimida ta’kidlanganidek, mazkur esdalik nishoni mamlakatimiz taraqqiyotiga, uning tinchligi va barqarorligiga, jamiyatda millatlararo totuvlik va diniy bag‘rikenglik muhitini mustahkamlashga, yosh avlodni milliy va umuminsoniy qadriyatlar ruhida tarbiyalashga munosib hissa qo‘shayotgan fidoyi insonlarga bildirilgan yuksak ehtirom va e’tirof ramzidir.
Tadbir yakunida taqdirlanganlar o‘zlariga bildirilgan yuksak ishonch va e’tibor uchun minnatdorlik bildirib, mamlakatimiz tinchligi va ravnaqi yo‘lidagi ezgu faoliyatlarini yanada sidqidildan davom ettirishlarini ta’kidladilar.
Barcha mukofot sohiblarini samimiy muborakbod etamiz!
Mustaqilligimizning 35 yilligi muborak bo‘lsin!
O‘zbekiston musulmonlari idorasi Matbuot xizmati
