O`zbekiston musulmonlari idorasi

“Eshon Temirxon to'ra” jome masjidi qaytadan bunyod etilib, Ramazon oyiga mo'min-musulmonlarga tuhfa etildi

11.04.2021 3502 3 min.

Bugun, 11 aprel' kuni O'zbekiston musulmonlari idorasi raisi, muftiy Usmonxon Alimov hazratlari boshchiligidagi ulamolar Ishtixon tumanining olis hududida joylashgan “Eshon Temirxon to'ra” masjidi va majmuasini ziyorat qilgandan so'ng yangi ta'mirlangan masjidning tantanali ochilish marosimida qatnashdilar. Muftiy hazratlariga Diniy idora ishboshqaruvchisi Rustam hoji Jamilov va viloyat bosh imom-xatibi Zayniddin domla Eshonqulov hamroxlik qilishmoqda. Marosimda taniqli ulamolar, nuroniy otaxonlar, tajribali imom-xatiblar, masjid jamoasi, uzoq-yaqindan kelgan mehmonlar ishtirok etdi.

Marosimda muftiy Usmonxon Alimov hazratlari yig'ilganlarni masjid ochilishi va muborak Ramazon oyi bilan qutladilar. Yurtimiz va dunyoda bo'layotgan voqea-hodisalar, ulug' oydagi ibodatlarning fazli, uni g'animat qilish to'g'risida ma'ruza qildilar.

“Eshoni Temirxon to'ra” jome masjidi 1993 yillarda xalq hashari yo'li bilan qurilgan bo'lib, masjidning yangi binosi 2019-2021 yillar davomida zamonaviy loyiha asosida ta'mirlandi, – deydi masjid imom xatibi Toshmuhammad Abilov. – Masjid hovlisining umumiy maydoni 5 gektar, yangi binoga 1000 nafar namozxon sig'adi. Masjidning moviy gumbazi uzoq-uzoqdan kishilarni o'ziga jalb etib turibdi.

Shuningdek, ma'muriyat (imom-xatib, noiblar) xonalari, oshxona, qorovulxona va mehmonxona kabi qo'shimcha binolar mavjud.

30 kishiga mo'ljallangan erkaklar tahoratxonasi va ayollarning alohida tahoratxonasida barcha zarur sharoitlar qilingan. Masjid “Sohibkor”, “Orlot”, “Qayirma”, “O'zbek qo'rg'on”, “Bog'ixon” mahallalaridan yashovchi mo'min-musulmonlarga xizmat qiladi. Kundalik besh vaqt namozda 100 dan ziyod, juma va hayit namozlarida 1000 dan ortiq kishi qatnashadi.

Tadbirdan so'ng masjidning yangi binosida yig'ilgan mo'min-musulmonlar jamoat bo'lib peshin namozini ado etdilar, muftiy ma'ruza qildilar.

Alloh taolo ushbu masjidni barchaga muborakbod aylab, qiyomatga qadar mo'min-musulmonlarga xizmat qilishini nasib etsin!