Muftiy hazratlari “Domla Kamoliddin Oxun” masjidining yangi binosini namozxonlarga ochib berdilar
Bugun, 11 aprel' kuni Samarqand viloyati Qo'shrabot tumani “Domla Kamoliddin Oxun” jome masjidining ochilish marosimi o'tkazildi. Unda O'zbekiston musulmonlari idorasi raisi, muftiy Usmonxon Alimov hazratlari boshchiliklarida diniy idora ish boshqaruvchisi Rustam hoji Jamilov, viloyat bosh imom-xatibi Zayniddin domla Eshonqulov, taniqli ulamolar, mo'ysafid otaxonlar, viloyat mutasaddilari, masjid jamoasi va uzoq-yaqindan kelgan mehmonlar ishtirok etdi.
Muftiy hazratlari boshchiligidagi mehmonlar dastlab “Domla Kamoliddin Oxun” maqbarasini ziyorat qilishdi. Qur'oni karim oyatlari tilovati o'qilib, xayrli duolar qilindi.
Shundan so'ng “Domla Kamoliddin Oxun” masjid va majmuasining ochilish marosimi bo'lib o'tdi. Unda Muftiy hazratlari mo'min-musulmonlarni masjidning yangi binosi va Ramazoni sharif bilan muborakbod etdilar. Yurtimizda diniy-ma'rifiy sohadagi islohotlar, Ramazon oyining fazilatlaridan bahramand bo'lish lozimligi, bunda taroveh namozlarda tartib-qoidalarga amal qilish haqida ma'ruza qildilar.
“Domla Kamoliddin Oxun” jome masjidi 1990 yillar hashar yo'li bilan qurilgan bo'lib, 2020-2021 yillar davomida zamonaviy loyiha asosida hashar yo'li bilan qayta qurildi, deydi masjid imom-xatibi Nabijon domla Jangirov. – Masjidning umumiy er maydoni bir gektardan oshiq. Masjid yangi binosining qurilishi 2020 yil 14 iyunda boshlanib, 2021 yil 20 mart oyida yakunlandi. Honaqoh va ayvoni hududi 21×18 ni tashkil etadi. Balandligi 17 metr, aylanasi 7,5 metr bo'lgan gumbaz jomega o'zgacha husn berib turibdi. 15 kishilik erkaklar tahoratxona (ayollar uchun ham alohida) da barcha sharoitlar yaratilgan. avtoturargoh ham bor. Masjid “Shova”, “Navkar”, “Qovunchi” mahallalariga xizmat qiladi. Honaqohning o'ziga 450 kishi, hovlisiga 1000 mingga yaqin sig'adi. Masjid Qo'shrabot tumanidagi eng katta masjid hisoblanadi.
Muftiy hazratlari ushbu fayzli majmua va masjid Qiyomatga qadar mo'min-musulmonlarga xizmat qilishini Haq taboraka va taolodan duo qilib so'radilar.
O'zbekiston musulmonlari matbuot xizmati
Hijriy yangi yilingiz muborak bo‘lsin!
2025 yilning 26 iyun kuni – yangi 1447 hijriy yil – Muharram oyi boshlanishining 1 kunidir. Ashuro kuni 2025 yilning 5 iyul, shanba kuniga to‘g‘ri keladi.
Muharram oyi qanday oy?
Muharram oyi – musulmonlar taqvimining birinchi oyidir. Bu oy Alloh taolo urush, qon to‘kishni harom qilgan (Zulhijja, Zulqa’da, Muharram, Rajab) to‘rt oyning biri bo‘lib, uning o‘ninchi kuni ya’ni, ashuro kuni alohida fazilatlarga ega.
Ashuro qanday kun?
Bu kun haqida Rasululloh sollallohu alayhi vasallam: “Bu shunday yaxshi kundirki, bu kunda Alloh Bani Isroilni dushmanlaridan qutqargan. Shu bois Muso alayhissalom bu kunda ro‘za tutgan. Men Musoga ko‘proq (yaqin bo‘lishga) haqliroqman”, dedilar va u kunda ro‘za tutib, odamlarni ham uning ro‘zasini tutishga buyurdilar” (Imom Buxoriy rivoyati).
Ashuro kuni ro‘za tutish o‘tgan bir yillik gunohlarga kafforat bo‘ladi.
Bu haqda Rasululloh sollallohu alayhi vasallam: “Ashuro kunining ro‘zasi – Allohdan umid qilamanki – bir yil oldingi gunohlarga kafforat bo‘ladi”, deganlar (Imom Muslim rivoyati).
Bu kun yaqinlarga kengchilik qilish, bir yillik kengchilikka sabab bo‘ladi.
Abu Sa’d roziyallohu anhudan rivoyat qilinadi. Nabiy sollallohu alayhi vasallam: “Kim Ashuro kuni ahli ayoliga kenglik yaratsa, Alloh unga yil bo‘yi kenglik yaratadi”, dedilar (Imom Bayhaqiy rivoyati).
Sufyon ibn Uyayna rahmatullohi alayh: “Bu hadisni oltmish yil tajriba qildim va faqatgina yaxshilik ko‘rdim”, deganlar.
Ashuro kunini Rasululloh sollallohu alayhi vasallam qanday o‘tkazardilar?
Rasululloh sollallohu alayhi vasallam bu kunni o‘tkazib yubormaslik uchun qattiq harakat qilardilar, uning savobiga erishish uchun bu kunning kelishini intiqlik bilan kutardilar. Bu haqda Ibn Abbos roziyallohu anhu aytadilar: “Rasululloh sollallohu alayhi vasallamni Ashuro kuni ro‘zasini Ramazon oyi ro‘zasini kutib sog‘ingandek, boshqa kun va oy ro‘zasini kutganlarini ko‘rmadim” (Imom Buxoriy, Imom Muslim rivoyati).
Abdulloh ibn Abbos roziyallohu anhudan rivoyat qilinadi. Rasululloh sollallohu alayhi vasallam Ashuro kuni ro‘zasini tutib, odamlarni ham bu kunning ro‘zasini tutishga buyurganlarida, sahobalar: “Yo, Rasululloh! Bu kun yahudiy va nasroniylar ulug‘laydigan kun-ku!” deyishdi. Shunda Rasululloh sollallohu alayhi vasallam: “Alloh xohlasa kelasi yil to‘qqizinchi kuni ham tutamiz”, dedilar. Ammo, kelasi yil kelmasidan Rasululloh sollallohu alayhi vasallam vafot etdilar (Imom Muslim rivoyati).
Ulamolarimiz Rasululloh sollallohu alayhi vasallamning ushbu niyatlariga e’tiboran, Ashuro kuniga qo‘shib bir kun oldingi yoki bir kun keyingi kunda ham ro‘za tutmoq afzal deydilar.
Alloh taolo ushbu oyning fazilatlaridan barcha mo‘min-musulmonlarni to‘liq bahramand etsin. O‘zining roziligini topadigan amallarda bardavom qilsin.
O‘zbekiston musulmonlari idorasi
Matbuot xizmati
