Kecha 10 aprel' kuni Sirdaryo viloyatining Sardoba tumanidagi «Shayh Nazrulloxon eshon» jome masjidining ochilish marosimi bo'lib o'tdi.

Qaytadan qurilib, xalqimiz mo'min musulmonlari uchun foydalanishga topshirilgan yangi masjidining xonaqosi 750 o'ringa mo'ljallangan bo'lib, zamonaviy tahoratxona va barcha qulayliklarga ega bo'lgan xizmat xonalari bunyod etildi.

Yangi masjidning ochilish marosimida O'zbekiston musulmonlari idorasi masjidlar bo'limi boshlig'i Muhammadnazar domla Qayumov, O'zbekiston musulmonlari idorasi Sirdaryo viloyati vakili Habibulloh domla Zokirov ishtirok etishdi.

Tadbirda masjid qurilishida jonbozlik ko'rsatgan barcha saxovatpeshalarga minnatdorchilik bildirildi. Shuningdek, marosimga tashrif buyurgan mehmonlarga shukrona dasturxoni yozildi.

Tadbir so'ngida Qur'oni karim tilovati o'qilib, o'tganlarga baxshida etildi, yangi masjid to qiyomatga qadar musulmonlar uchun ibodatxona bo'lishini yaratgandan so'rab duolar qilindi.

O'MI matbuot xizmati