Qorilarga tavsiyalar berildi
Kecha 10 aprel' kuni «Shayx Muhammad Sodiq Muhammad Yusuf» majmuasining majlislar zalida muborak Ramazon oyida Qur'oni Karim xatmonalarini yurtimiz masjidlarida qanday o'tkazish masalasi bo'yicha aniq rejalar belgilab olindi. Ushbu yig'ilishda O'zbekiston musulmonlari idorasi raisining birinchi o'rinbosari Homidjon domla Ishmatbekov, Toshkent shahar bosh imom-xatibi Nuriddin domla Holiqnazarov, O'zbekiston musulmonlari idorasi masjidlar bo'limi boshlig'i Muhammadnazar Qayumov hamda taroveh namozida xatmu Qur'onda ishtirok etuvchi yurtimiz qorilari qatnashdi. Yig'ilishda bu yilgi Ramazon oyini qanday o'tkazish lozimligi, maqsad va vazifalar belgilab olindi. Shuningdek, Qur'on xatmonalarini qiroat qiluvchi qorilarimizga tavsiyalar va ko'rsatmalar berib o'tildi.
Ma'lumki bu yilgi Ramazon oyida ba'zi xorij mamlakatlarida koronavirus pandemiyasi sabab masjidlarda taroveh namozlariga ruxsat berilmadi. Shuni inobatga olib bugungi yig'ilishda bu yilgi Ramazonni ko'tarinki ruhda o'tkazish uchun yurtimizda alohida tayyorgarlik ishlari amalga oshirildi va barcha sharoit va qulayliklar xalqimizga yaratib berilayotgani aytib o'tildi. Hususan, har bir musulmon shaxs masjidlarga tashrif buyurar ekan, belgilab qo'yilgan karantin qoidalariga, ya'ni niqob va masofalarni saqlashi, ko'rsatilgan qonun-qoidalarga rioya qilishi ta'kidlab o'tildi.
Alloh taolo barchalarimizni Ramazonga etishimizni va ushbu muborak oyning barokotidan nasibador bo'lishimizga muvaffaq qilsin!
islom.uz
Bu hadisni Rasululloh ﷺdan eshitganmisiz?
Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.
Hazrati Muoviyaning davrlarida ikki odam janjallashib qoldi. Janjal asnosida biri boshqasining tishini urib sindirdi. U singan tishini olib, Muoviya roziyallohu anhuning huzurlariga bordi va: «Tishning qasosi tish bo‘ladi, shuning uchun qasos olib bering», dedi.
Hazrati Muoviya: «To‘g‘ri, sening haqqing bor, lekin nima foyda? Sening tishing-ku sinib bo‘ldi. Unikini ham sindiraylikmi? Uning o‘rniga tishingning xunini ol, xun evaziga murosa qil», dedilar.
U kishi: «Men aynan o‘sha tishini sindirib qasos olaman», dedi. Muoviya roziyallohu anhu unga yana qayta tushuntirdilar. Lekin u ko‘nmadi. Hazrati Muoviya keyin: «Undoq bo‘lsa yur, uning ham tishini sindiramiz», dedilar.
Yo‘lda mashhur sahoba Abu Dardo roziyallohu anhu o‘tirgan edilar. U zot shunday dedilar: «Birodar! Qara, sen-ku qasos olyapsan. Lekin bu gapni ham eshitib ket. Men Rasululloh sollallohu alayhi vasallamning: «Kim birovga aziyat yetkazsa va aziyat yetgan kimsa uni kechirib yuborsa, Alloh taolo uni afvga eng ko‘p muhtoj bo‘ladigan kunda (ya’ni oxiratda) afv qiladi», deganlarini eshitganman».
Boyagina g‘azabga minib, xun haqi olishga hech rozi bo‘lmay turgan odam ushbu hadisni eshitgach: «Siz bu hadisni Rasululloh sollallohu alayhi vasallamdan eshitganmisiz?» deb so‘radi. Abu Dardo roziyallohu anhu: «Ha, eshitganman, mening mana shu quloqlarim eshitgan», dedilar.
«Nasihatlar guldastasi» kitobidan