Ramazon oyiga tayyorgarlik ko'rish bo'yicha videokonferentsiya tashkil etildi
Joriy yil 6 aprel' kuni “Ramazon oyini yuqori saviyada o'tkazish munosabati bilan amalga oshiriladigan tadbirlar yuzasidan” ZOOM dasturi platformasida onlayn muloqat bo'lib o'tdi.
Unda O'zbekiston Respublikasi Vazirlar Mahkamasi huzuridagi Din ishlari bo'yicha qo'mita, O'zbekiston musulmonlari idorasi, “Vaqf” xayriya jamoat fondi, Qoraqalpog'iston Respublikasi Vazirlar Kengashi raisi, Toshkent shahar va viloyatlar hokimlarining jamoat va diniy tashkilotlar bilan aloqalar bo'yicha o'rinbosarlari, Qoraqalpog'iston musulmonlari qoziyoti qozisi, Toshkent shahri va viloyatlar, tuman-shahar bosh imom-xatiblari ishtirok etdi.
Videomuloqotda Din ishlari bo'yicha qo'mita raisi Abdug'ofir Axmedov muborak Ramazon oyini tartibli, sanitariya qoidalari va karantin talablariga to'liq rioya etgan holda o'tkazish hamda imom-xatiblar mas'uliyatini yanada oshirish, muborak oyda o'tkaziladigan tadbirlarni ixcham, ortiqcha dabdaba va isrofgargiliksiz o'tkazish borasidagi muhim ko'rsatma va tavsiyalarni aytib o'tdi.
Shuningdek, A.Axmedov tomonidan viloyat bosh imom-xatiblari va mas'ullarga muborak oy davomida xalqimizga xos bo'lgan saxovat va muruvvat ishlarini yanada jadallashtirish, imom-xatiblar tomonidan islom dinining insonparvarlik g'oyalarini keng targ'ib qilish, yoshlarni turli yot g'oya va qarashlardan himoyalash, xalqimizni o'zaro mehr-oqibatli bo'lishga chaqirish borasidagi chiqishlarini muntazam tashkil etish masalasiga alohida e'tibor qaratish kerakligi uqtirildi.
O'z navbatida, Respublikada faoliyat yuritayotgan barcha masjidlarda keng qamrovli obodonlashtirish ishlarini tashkil etish, elektr jihozlari, ovoz kuchaytirgichlarni uzluksiz soz holatda ishlashini ta'minlash alohida ta'kidlandi.
Videomuloqotda O'zbekiston musulmonlari idorasi raisining birinchi o'rinbosari Homidjon Ishmatbekov masjid-madrasalarda Ramazon oyiga katta tayyorgarlik ishlari olib borilayotgani, xatmi-Qur'on tadbirlarini fayzli o'tkazish va mo'min-musulmonlarga qulay shart-sharoitlar tashkil etish, ayniqsa, sanitariya-epidemiologiya qoidalariga qat'iy rioya etish bo'yicha bir qator ishlar amalga oshirilganini ta'kidladi.
Yig'ilish yakunida Ramazon oyini tartibli o'tkazish yuzasidan berilgan vazifa va topshiriqlarni o'z vaqtida bajarish bo'yicha viloyat bosh imom-xatiblarining fikr-mulohazalari tinglandi hamda Ramazon oyini belgilangan tartibda o'tkazishga kelishib olindi.
Din ishlari bo'yicha qo'mita
Axborot xizmati
Anjuman qatnashchilari Islom sivilizatsiyasi markaziga sayohat qilishdi
Xabar berganimizdek, 19-20 avgust kunlari Islom sivilizatsiyasi markazida O‘zbekiston musulmonlari idorasi tasarrufidagi oliy va o‘rta maxsus diniy ta’lim muassasalari professor-o‘qituvchilarining «Zamonaviy diniy ta’lim: pedagogika, ilm-ma’rifat va innovatsiya» nomli I ilmiy-amaliy anjumani bo‘lib o‘tmoqda.
Bugun, 19 avgust kuni ishtirokchilar kutib olinib, ularning Islom sivilizatsiyasi markaziga sayohati tashkil etildi. Tashrif davomida mehmonlar markazning boy ekspozitsiyalari, Qur’oni karim zali, nodir qo‘lyozmalar hamda buyuk ajdodlarimizning ilmiy merosiga bag‘ishlangan bo‘limlar bilan yaqindan tanishdi. Ayniqsa, zamonaviy multimedia loyihalari va tarixiy eksponatlar ularda chuqur taassurot qoldirdi.
Ustozlar Markazda amalga oshirilayotgan keng ko‘lamli ishlar islom ma’rifatini targ‘ib qilish hamda yosh avlodni milliy-diniy qadriyatlarga hurmat ruhida tarbiyalashda muhim ahamiyat kasb etishini e’tirof etishdi.
Shuningdek, ishtirokchilar O‘zbekiston musulmonlari idorasida ham bo‘lishdi. Hazrati Imom majmuasidagi tarixiy qadamjo va obidalarni ziyorat qilishdi.
Oqshomda Islom sivilizatsiyasi markazi binosida ma’rifiy dastur – mapping namoyish qilindi.
Mazkur tadbirlar islom sivilizatsiyasi merosini targ‘ib etish, diniy ta’lim tizimini yanada takomillashtirib, yangi bosqichga olib chiqishda salmoqli hissa bo‘lib qo‘shiladi.
O‘zbekiston musulmonlari idorasi Matbuot xizmati
- «
- »