"Sarhisob" tanlovi g'oliblariga mukofotlar muborak bo'lsin!
Bir necha yillardan buyon ajdodlarimiz merosini o'rganish, milliy-diniy qadriyatlarimizni tiklash, dinlararo bag'rikenglik va hamkorlik g'oyalarini ommalashtirish, xalqimiz, ayniqsa, o'sib kelayotgan yosh avlod ongida yot g'oyalarga qarshi mustahkam immunitetni shakllantirish bo'yicha amalga oshirilayotgan ishlarni ommaviy axborot vositalarida keng yoritish, ushbu yo'nalishda faol mehnat qilayotgan ijodkorlarni munosib rag'batlantirish va taqdirlash maqsadida "Sarhisob" tanlovi o'tkazilib kelinadi.
Aytish kerakki, "Sarhisob" tanlovi diniy-ma'rifiy yo'nalishda qalam tebratib, ijodini rivojlantirayotgan qalam ahlini, yosh iqtidorlarni aniqlashga va ularni munosib rag'banlantirishga xizmat qilmoqda.
Tanlov ikki bosqichda o'tkazildi. Dastlab hududiy bosqich g'oliblari aniqlandi. Viloyat miqyosida g'oliblikn qo'lga kiritganlar respublika bosqichida ishtirok etish imkoniyatiga ega bo'ldilar. Respublika bosqichiga o'tgan ishtirokchilarning ijodlari maxsus hay'at tomonidan ko'rib chiqildi. Yuborilgan materiallar orasidan tanlov shartlariga javob bermaydiganlari chiqarib tashlandi. Hususan, qog'ozga chiqarilmay faqat maqola linki jo'natilgan maqolalar, saytlardan to'liq ko'chirib olingan ma'lumotlar shular jumlasidandir.
Tanlov beshta yo'nalish bo'yicha tashkil etildi – “Yilning eng faol targ'ibotchisi”, “Televideniye”, “Radio”, “Davriy matbuot” va “Internet”. Shuningdek, tanlov natijasida yil davomida faolligi bilan alohida ajralib turgan eng yaxshi ijodiy ish bo'yicha yagona o'rinli – "Jaholatga qarshi – ma'rifat" mavzusidagi eng yaxshi ijodiy ish yo'nalish ham o'rin oldi. Ushbu nominatsiyalar bo'yicha respublikamizning turli viloyatidan faol ijodkorlar ishtirok etishdi.
Ammo 2020 yilgi koronavirus pandemiyasi sababli tanlov g'oliblarini taqdirlash biroz muddatga surildi. Qolaversa koronavirus pandemiyasi davom etayotgani uchun onlayn tartibda o'tkazildi. Hay'at a'zolari tomonidan quyidagi ishtirokchilar tanlov g'olibi deb topildi:
BOSh MUKOFOT – ENG YaHShI IJODIY ISh
Toshkent shahar bosh imom-xatibi Holiqnazarov Nuriddin
TYeLYeVIDYeNIYe YO'NALIShI
1-o'rin: To'lqin Shamsiyev, “Madaniy-ma'rifiy va badiiy dam olish dasturlar” muharririyati rejissyori (“Hidoyat sari” ko'rsatuvi);
2-o'rin: Bahadir Abdiramanov, Qoraqalpog'iston Respublikasi Nukus shahridagi “Muhammad al-Beruniy” o'rta maxsus islom bilim yurti o'qituvchisi.
3-o'rin: Mirzamaqsud Alimov, Andijon viloyati bosh imom-xatibi;
RADIO YO'NALIShI
1-o'rin: Ishoq Arabov, “Ziyo chashmasi”, “Ma'rifat ziyosi”, “Imom Buxoriy o'gitlari” dasturlari muharriri;
2-o'rin: Bahromjon Tursunov, Farg'ona shahar “Jo'ydam” masjidi imom-xatibi;
3-o'rin: Muhammadi Qorayev, O'zbekiston musulmonlari idorasining Qashqadaryo viloyatidagi vakili o'rinbosari, Qarshi shahar "Qumqishloq" jome masjidi imom-xatibi.
DAVRIY MATBUOT YO'NALIShI
1-o'rin: Azizbek Holnazarov, “Shamsuddinxon Boboxonov NMIU” muharriri.
2-o'rin: Salimjon Shokirov, Andijon shahri “Honaqo” jome masjidi imom-xatibi.
3-o'rin: Qurbonali Pirmatov, Farg'ona shahri Beshariq tumani “Uzun” jome masjidi imom-xatibi.
INTYeRNYeT YO'NALIShI
1-o'rin: Rahmatulloh Jalilov, Farg'ona viloyati Marg'ilon shahar “Sahoba Zayd ibn Horisa” jome masjidi imom-xatibi, Fargonaziyo.uz sayti muharriri.
2-o'rin: Ruhiddin Akbarov, O'zbekiston musulmonlari idorasi Qashqadaryo viloyati vakilligi xodimi.
3-o'rin: Muhammad Yusuf To'raqulov – Andijon Oltinko'l tumani bosh imom-xatibi.
ENG FAOL TARG'IBOTChI YO'NALIShI
1-o'rin: Jaloliddin Hamroqulov, Toshkent shahri “Novza” jome masjidi imom-xatibi, Imom Buxoriy nomidagi Toshkent Islom instituti katta o'qituvchisi;
2-o'rin: Jasur Raupov, Toshkent viloyati bosh imom-xatibi;
3-o'rin: Sattarov Hayrullo, Samarqand viloyati bosh imom-xatibi o'rinbosari.
Tanlov g'oliblariga tanlov mezoniga ko'ra, 3-o'ringa – mini pech', 2-o'ringa – blender, 1-o'ringa – changyutgich, Oliy mukofotga esa zamonaviy (Smart) Televizori topshiriladi.
Alloh taolo barcha g'oliblarni O'zining roziligi bilan mukofotlasin. Din xizmati, musulmonlar manfaati yo'lida olib borayotgan xayrli amallarida O'zi kuch-quvvat ato etsin. Barchamizni dini xizmatiga qabul qilganlar qatorida qilsin!
O'zbekiston musulmonlari idorasi Matbuot xizmati
Toshkentda "Islom sivilizatsiyasi: yangi nigoh – yangi kashfiyotlar" xalqaro mediaforumi ochildi
Toshkentda 25 avgust kuni O‘zbekiston Prezidenti Shavkat Mirziyoyev tashabbusi bilan tashkil etilgan «Islom sivilizatsiyasi: yangi nigoh — yangi kashfiyotlar» xalqaro mediaforumining rasmiy ochilish marosimi bo‘lib o‘tdi.
Marosim O‘zbekistondagi Islom sivilizatsiyasi markazining Katta konferens-zalida o‘tkazildi. Tadbir ishtirokchilariga «Jahon jamoatchiligining Islom sivilizatsiyasi markaziga nigohi» maxsus filmi namoyish etildi.
Tadbirda O‘zbekiston Prezidenti matbuot kotibi, Prezident Administratsiyasi Kommunikatsiyalar departamenti rahbari Sherzod Asadov tabrik so‘zi bilan ishtirok etdi. O‘zbekiston Respublikasi Prezidenti Administratsiyasi maslahatchisi Muzaffar Komilovning forum ishtirokchilariga yo‘llagan murojaatini O‘zbekiston Respublikasi Prezidenti Administratsiyasining mas’ul xodimi Rahmatulla Arziyev o‘qib eshittirdi.
Forum ishtirokchilariga yo‘llangan qutlov so‘zlarida xorijiy mehmonlar va media hamjamiyati vakillariga minnatdorlik bildirildi. Forumning professional muloqot, xalqaro hamkorlik va O‘zbekistonning tarixiy-madaniy merosini ilgari surish maydoni sifatidagi ahamiyati ta’kidlandi.
Marosimning asosiy voqealaridan biri Euronews bosh direktori va bosh muharriri Klaus Shtrunsning «Yangi yaqinlik: madaniyat, media va g‘oyalar orqali Yevropa va Markaziy Osiyoni birlashtirish — Islom sivilizatsiyasi markazi global axborot makonida» mavzusidagi maxsus ma’ruzasi bo‘ldi.
Shtruns islom sivilizatsiyasining tarixiy, ilmiy, ma’naviy va madaniy merosini zamonaviy media formatlar orqali jahon auditoriyasiga yetkazish, shuningdek, Yevropa va Markaziy Osiyo o‘rtasida axborot almashinuvini kuchaytirish muhimligini ta’kidladi.
Uning qayd etishicha, media vositalari turli mamlakatlar va jamiyatlar o‘rtasida nafaqat axborot almashinuvini ta’minlashi, balki muloqot uchun ko‘priklar ham qurishi kerak.
«Media vositalari fikrlar va yangiliklar almashinuvi uchun ko‘priklar qurishi mumkin va qurishi shart. Axir media kommunikatsiyasining mohiyati ham aynan shunda — ko‘priklar qurishda. Bugun bu yerda, qadimiy Ipak yo‘lida, kelajagimiz uchun aynan shu jarayon sodir bo‘lmoqda», — dedi Klaus Shtruns.
Euronews rahbari Yevropa va Markaziy Osiyo o‘rtasidagi axborot makonini yanada yaqinlashtirishni tarixiy Ipak yo‘li an’analari bilan qiyosladi. Uning ta’kidlashicha, mintaqalar o‘rtasidagi zamonaviy media aloqalar iqtisodiy, madaniy va ijtimoiy hamkorlikning yangi imkoniyatlarini ham ochishi mumkin.
«Ipak yo‘lida axborot oqimi qanday kechgan bo‘lsa, bir-birimiz bilan muloqot qilish, bir-birimizning tilimizni tushunish ham shunday bo‘lsin. Bu oddiy texnik jarayondan ko‘ra kengroq tushuncha. Bu haqiqiy hamkorlikning yangi ko‘rinishi, kelajakdagi butun iqtisodiy taraqqiyot uchun harakatlantiruvchi kuch bo‘ladigan yangi axborot makonidir», — dedi u.
Klaus Shtruns, shuningdek, O‘zbekistonda yosh avlodning katta ulushga ega ekanini alohida qayd etib, bu mamlakatning kelajagi uchun ulkan imkoniyat ekanini ta’kidladi. U turli mamlakatlar yoshlarini birlashtiruvchi media va madaniy loyihalarni amalga oshirish taklifini ilgari surdi.
Uning fikricha, turli sohalar — sport, ilm-fan, ta’lim va madaniyat vakillaridan iborat yoshlarni bir joyga to‘plab, ularning tajriba almashinuvi, hujjatli filmlar suratga olishi va qo‘shma loyihalarda ishtirok etishi uchun imkoniyat yaratish mumkin. Bunday tashabbuslar orqali mamlakatlar va mintaqalar yoshlari o‘rtasida yangi aloqalarni shakllantirish mumkin.
«Bu faqat chiroyli nutqlarda emas, balki aniq va amaliy loyihalarda o‘z ifodasini topishi kerak», — dedi Euronews bosh direktori.
Shtruns media sohasidagi innovatsiyalar ham aynan shu maqsad — o‘tmish merosini asrab, kelajakni birgalikda yaratishga xizmat qilishi kerakligini ta’kidladi.
«Eng muhimi, media doimo innovatsiyalarni harakatga keltiruvchi kuch bo‘lishi kerak. Ammo bu innovatsiyalar bugun men eshitgan ajoyib maqsadga xizmat qilishi lozim: media sohasida innovatsiyalarni ilgari surish, qalbimizda o‘tmishni asrab, kelajakni yaratish», — dedi u.
Euronews rahbari forumda ishtirok etishni media sohasining jamiyat oldidagi mas’uliyati bilan bog‘ladi. Uning ta’kidlashicha, jurnalistika va media faoliyati faqat biznes yoki kasb emas, balki turli jamiyatlarni yaqinlashtirishga xizmat qiladigan muhim vazifadir.
«Ushbu noodatiy tadbirda media hamkor sifatida ishtirok etayotganimizdan faxrlanamiz. Biz uchun bu shunchaki biznes emas, oddiy kasb ham emas. Bu — o‘z burchimiz va da’vatimizdir», — dedi Klaus Shtruns.
Shu tariqa, forumning ochilish marosimida media sohasining zamonaviy vazifalari, xalqaro axborot hamkorligini rivojlantirish, madaniy merosni yangi formatlarda jahon auditoriyasiga taqdim etish va turli mintaqalar o‘rtasida yangi axborot ko‘priklarini barpo etish masalalariga alohida e’tibor qaratildi.
O‘zbekistondagi Islom sivilizatsiyasi markazi direktori, WOSCU Boshqaruv raisi Firdavs Abduxaliqov «Islom sivilizatsiyasi markazi — yangi turdagi madaniy-ma’rifiy media platforma» mavzusida maxsus ma’ruza qildi.
Abduxoliqov Markaz konsepsiyasini tarixiy meros, ilm-fan, muzey ishi va yangi medialarni birlashtiruvchi zamonaviy xalqaro maydon sifatida taqdim etdi. U islom sivilizatsiyasi merosi hujjatli filmlar, televizion loyihalar, raqamli rekonstruksiyalar, multimedia va immersiv ekspozitsiyalar, shuningdek, nashriyot tashabbuslarida qanday yangi talqin kasb etayotgani haqida ma’lumot berdi. Markazning xalqaro media loyihalari, dunyodagi yetakchi ommaviy axborot vositalari bilan hamkorligi, shuningdek, tarixiy merosni o‘rganish va ommalashtirishda sun’iy intellekt hamda raqamli texnologiyalardan foydalanish masalalariga alohida e’tibor qaratildi.
Marosim ishtirokchilariga, shuningdek, Islom sivilizatsiyasi markazi haqida prezentatsion rolik namoyish etildi.
Xalqaro mediaforumda 50 ta davlatdan media va ekspertlar hamjamiyatining 300 nafarga yaqin vakili ishtirok etmoqda. Ular orasida xalqaro telekanallar va axborot agentliklari rahbarlari hamda vakillari, jurnalistlar, noshirlar, kinematografistlar, olimlar, tadqiqotchilar va raqamli texnologiyalar sohasi mutaxassislari bor.
iccu.uz
