Shu yilning 9-24 mart kunlari yurtimiz masjidlarida faoliyat yuritayotgan bir guruh imom noiblari kasb-mahoratlarini oshirish uchun tashkil etilgan 72 soatlik malaka oshirish kurslarini muvaffaqiyatli tomomladilar.

Shu munosabat bilan O'zbekiston xalqaro islom akademiyasi Malaka oshirish markazida bitiruv tadbiri bo'lib o'tdi. Unda O'zbekiston musulmonlari idorasi raisi o'rinbosari Ibrohimjon Inomov qatnashdilar va imom noiblarining kelgusidagi faoliyatlaridagi muhim vazifalariga urg'u qatratdilar.

Tadbir davomida imom noiblariga ikki haftalik malaka oshirish kursini tomomlaganlik haqida sertifikat topshirildi. O'z navbatida tinglovchilar ham Malaka oshirish markazidagi sharoitlar, mazmunli dars va mashg'ulotlar uchun minnatdorlik bildirishdi.

Ikki hafta mobaynida tinglovchilarga Islom tarixi va manbashunoslik, qur'onshunoslik va hadisshunoslik, fiqh va kalom ilmi yo'nalishida umumiy tayyorgarlik, umumkasbiy tayyorgarlik, mutaxassislik bo'yicha tayyorgarlik, tanlov fanlari bo'yicha mashg'ulotlar bo'lib o'tdi.

Darslarga sohaning etuk mutaxassislari jalb etilgani mashg'ulotlarning qiziqarli, samarali bo'lishini ta'minladi hamda tinglovchilar qisqa vaqt ichida ko'plab zaruriy ma'lumotlarga ega bo'lishdi. Umuman har bir imom-xatib va imom noibning bu kabi o'quvlarda ishtirok etishi ularning bilim va ko'nikmasi, kasbiy salohiyatini yanada oshishiga xizmat qiladi.

Ushbu malaka oshirish kursida imom noiblari o'rgangan ilmlarini xalqimiz diniy-ma'rifiy savodxonligini oshirish yo'lida sarf etishadi, inshaalloh.

O'zbekiston musulmonlari idorasi matbuot xizmati