Shu yil 24 mart kuni Madaniyat vazirligi huzuridagi O'zbekistonga oid xorijdagi madaniy boyliklarni tadqiq etish markazining “O'zbekistonga oid xorijdagi qo'lyozma asarlar reestri. tom 1” kitobi taqdimoti bo'lib o'tdi.

Tadbirda O'zbekiston Tashqi ishlar vazirligi, O'zbekiston musulmonlar idorasi, Imom Buxoriy, Imom Termiziy xalqaro ilmiy tadqiqot markazlari, “O'zarxiv” agentligi, O'zbekiston xalqaro islom akademiyasi, Sharqshunoslik va Tarix institutlari, Temuriylar tarixi dalat muzeyi, O'zbekiston milliy kutubxonasi va boshqa tashkilotlar vakillari ishtirok etdi.

Taqdimot marosimida Tashqi ishlar vaziri maslahatchisi Rahmatilla Nazarov, Madaniyat vazirining birinchi o'rinbosari Jamol Nosirov, Imom Buxoriy xalqaro ilmiy tadqiqot markazi direktori Shovosil Ziyodov, “O'zarxiv” agentligi direktori maslahatchisi Shuxrat Tursunboyev va boshqalar so'zga chiqib, kitobning ahamiyati tug'risida fikr-mulohazalarini bildirdi.

Ushbu kitob O'zbekistonga oid xorijdagi madaniy boyliklarni tadqiq etish markazi xodimlarining ilk ilmiy mahsuli, unda ajdodlarimizning xorijdagi yozma merosini jamlagan, hajmi 496 betdan iborat.

O'zbek, rus va ingliz tilidagi qismlardan tashkil topgan to'plam “O'zbekistonga oid xorijda saqlanayotgan madaniy boyliklar reestrini tayyorlash, nodir qo'lyozma asarlarning faksemilesini nashr etish” loyihasi doirasida tayyorlangan. Unda 30 mamlakatning 97 tashkilotida saqlanayotgan Imom Buxoriy, Abu Rayhon Beruniy, Abu Mansur Moturidiy, Alisher Navoiy singari 150 dan ortiq buyuk alloma va mutafakkirlar hamda Temuriylar davriga oid qo'lyozma asarlarning 1001 ta ilmiy tavsifini o'z ichiga olgan.

Kamoliddin MAHKAMOV,
O'zbekiston musulmonlari idorasi
Kutubxona bo'limi mudiri