Mamlakatimizning Saudiya Arabistonidagi elchisi Ulug'bek Maqsudov Podshoh Faysal nomidagi tadqiqotlar va islomshunoslik markazi bosh kotibi doktor Saud Al-Sarhan bilan uchrashdi, deb xabar bermoqda «Dunyo» AA.

Doktor Saud Al-Sarhan joriy yil yanvar' oyida O'zbekistonga safari tafsilotlari bilan o'rtoqlashdi. Uning aytishicha, ushbu tashrif juda samarali bo'ldi va hamkorlikning qator aniq yo'nalishlari belgilab olindi. Jumladan, O'zbekistondagi Islom tsivilizatsiyasi markazi bilan anglashuv memorandum imzolanib, qo'lyozmalarni o'rganish bo'yicha amaliy takliflar ishlab chiqilgani qayd etildi.

Muloqot davomida Saudiya tomonidan Islom tsivilizatsiyasi markaziga moddiy-texnikaviy yordam masalasi muhokama qilindi.

O'zbekistondagi qo'lyozmalarni sterilizatsiyalash, qayta tiklash, mikroblardan saqlashda ishlatiladigan maxsus «Wei T’o» jihozini Islom tsivilizatsiyasi markaziga taqdim etish uchun buyurtma berilgani ta'kidlandi. Ushbu asbob Islom tsivilizatsiyasi markazidagi 2 mingdan ziyod qo'lyozmaning emirilishini oldini oladi va aslini yo'qotmagan holda saqlashda eng yaxshi vosita bo'lib xizmat qiladi.

«Wei T’o» asbobi tayyor bo'lgach, Faysal markazi tomonidan chop etilgan kitoblar majmuasi bilan birga O'zbekistonga etkazilishi ma'lum qilindi.
O'z navbatida elchixona vakillari respublikamizdagi qo'lyozmalarni o'rganish va ularni raqamlashtirish bo'yicha Saudiya tajribasini o'zlashtirish maqsadida o'zbekistonlik mutaxassislarning podshohlikka safarini tashkil etish taklifini bildirdi.

Shuningdek, O'zbekiston Prezidenti huzuridagi Strategik va mintaqalararo tadqiqotlar instituti, Fanlar akademiyasi Abu Rayhon Beruniy nomidagi sharqshunoslik instituti va mamlakatimizdagi boshqa ilmiy-tadqiqot markazlari bilan hamkorlikni faollashtirish xususida ham fikr almashildi.

Uchrashuv so'nggida Podshoh Faysal nomidagi tadqiqotlar va islomshunoslik markazida saqlanayotgan buyuk ajdodlarimiz Amir Temur, Alisher Navoiy, Zahiriddin Muhammad Boburga taalluqli qo'lyozma asar va kitoblardan nusxa olish bo'yicha kelishuvga erishildi.

O'zbekiston musulmonlari idorasi matbuot xizmati