BMT rahbari Antonio Guterrish 17 mart – Halqaro islomofobiyaga qarshi kurash kuni munosabati bilan murojaatida Qur'ondan xalqlar va qabilalar bir-birlarini tanib olish uchun yaratilgani haqidagi iqtibosni keltirdi, deb xabar bermoqda «Dunyo» AA.

BMT Yangiliklar markazi ma'lumotiga ko'ra, Bosh kotib musulmonlarga nisbatan salbiy munosabat «epidemiya darajasiga» etganini aytgan.

Dunyo bo'ylab musulmonlar stereotiplar, stigmatizatsiya, ijtimoiy yakkalatib qo'yish, kamsitish, zo'ravonlik kabi illatlarga duch kelmoqda, dedi Antonio Guterres. U, shuningdek, islom diniga e'tiqod qiladigan ayollar ba'zida jinsi, millati va diniga qarab «uch darajali kamsitish»ga uchrayotganini ta'kidlagan.

«Afsuski, ba'zi ommaviy axborot vositalari va hokimiyat vakillarining bayonotlari oqibatida salbiy stereotiplar jamoat ongida yanada mustahkam o'rnashib qolmoqda. Millatchilik va neonatsizmni qayta tiklanishi, stigmatizatsiya, shuningdek, aholining zaif guruhlari, xususan, musulmonlar, yahudiylar, ba'zi nasroniy jamoalarga qarshi nafrat illatlari shular jumlasidandir», - dedi BMT rahbari.

«Turli tumanlik - bu tahdid emas, balki katta boylikdir», dedi Antonio Guterresh. U diskriminatsiya, irqchilik va ksenofobiyaga qarshi kurash BMTning ustuvor vazifalaridan biri bo'lib qolishini ta'kidladi.

O'zbekiston musulmonlari idorasi matbuot xizmati