Samiya Hasan Suluhu Tanzaniya Prezidenti etib saylandi. Bu haqda islam.ruga asoslanib islom.uz xabar beradi.

Qasamyod qilish marosimi Tanzaniya prezidentlarining Dorus-salom qarorgohida bo'lib o'tdi.

«Men halol bo'lishga, Tanzaniya konstitutsiyasiga bo'ysunishga va uni himoya qilishga va'da beraman», deb qasamyod qildi Suluhu. Suluhu xonim Afrikadagi ushbu mamlakatda davlat rahbari lavozimiga tayinlangan birinchi ayol bo'ldi.

Avval bu muslima ayol vitse-prezident bo'lib faoliyat yuritgan. Mamlakatning avvalgi rahbari Jon Magufuli 17 mart kuni vafot etgan.

Mamlakat konstitutsiyasiga binoan, prezident vafot etgan taqdirda, vitse-prezident davlat rahbari lavozimini egallaydi va vakolat muddati tugaguniga qadar ushbu lavozimda qoladi.

61 yoshli Suluhuning amaldagi vakolati 2025 yil oxirida tugaydi.

Samiya Hasan Suluhu Zanzibarda tug'ilgan. U avval qator vazirlik lavozimlarida ishlagan.