Sha'bon oyi — ibodat oyi
Bismillahir Rohmanir Rohiym.
Alloh taologa bitmas-tuganmas hamdu sanolar bo'lsin.
Payg'ambarimizga mukammal va batamom salavotu durudlar bo'lsin.
Aziz mo'min musulmonlar, barchangizni muborak Sha'bon oyi — ibodat oyi bilan tabriklaymiz!
Islomda fazilatli oylardan biri bu — Sha'bondir.
Olimlardan biri shunday degan: «Rajab oyi badanni, Sha'bon oyi qalbni, Ramazon oyi esa ruhni tozalaydi. Agar Rajab oyida badan, Sha'bon oyida qalb tozalanmasa, Ramazon oyida ruh qanday tozalanadi?
Nabiy sollallohu alayhi vasallam bu oyning ko'prog'ini ro'za tutish bilan o'tkazardilar.
Oisha roziyallohu anho aytadilar: «Men Rasululloh sollallohu alayhi vasallamning Ramazon oyidan boshqa oyda to'la ro'za tutganlarini ko'rmaganman. Boshqa oylarda Sha'bondan ko'ra ko'proq ro'za tutganlarini ko'rmaganman».
Buxoriy va Muslim rivoyat qilishgan.
Usoma ibn Zayd roziyallohu anhu aytadilar: «Men Rasululloh sollallohu alayhi vasallamga dedim: «Ey Allohning Rasuli, boshqa biror oyda Sha'bonchalik ko'p ro'za tutganingizni ko'rmaganman?».
Payg'ambarimiz sollallohu alayhi vasallam dedilar: «Odamlar Rajab va Ramazon oylari orasidagi ushbu oy — Sha'bondan g'ofil bo'lib qoladilar. Bu shunday oydirki, unda bandalarning amallari olamlar Parvardigori huzuriga olib chiqiladi. Meni ham amallarim Allohning huzuriga olib chiqilganda ro'zador bo'lishni yaxshi ko'raman».
Abu Dovud, Nasoiy, Ibn Huzayma rivoyati.
Sha'bon — Muhammad sollallohu alayhi vasallamning oylari hisoblanadi.
Ushbu oy haqida Allohning Rasuli: «Sha'bon oyi mening oyimdir», deganlar.
Ummu Salama roziyallohu anho:
«Nabiy sollallohu alayhi vasallamning Sha'bon va Ramazondan boshqada ikki oy ketma-ket ro'za tutganlarini ko'rmadim», dedilar».
Termiziy yaxshi sanad bilan rivoyat qilgan.
Sha'bon va Ramazon oylari ketma-ket kelishi ma'lum, Payg'ambarimiz alayhissalom shu ikki oyning ro'zasini tutgan ekanlar. Bundan ham Sha'bon oyi ro'zasining fazilatli ekanligini bilib olamiz.
Sha'bon oyida ibodat qilgan, ro'za tutgan, Rasululloh sollallohu alayhi vasallamga salovot aytgan, umuman ushbu oyning barcha amallarini bajargan bandalarga ulug' mukofotlar va'da qilingan. Bu haqda hadisi quddisiyda Alloh taolo ishorat qilib: «Qarang, ko'ring, mening qullarim Rasulimning oyi bo'lmish Sha'bon oyiga qanday hurmat va e'tibor ko'rsatyaptilar. Jalolim haqqi, men ham ularni avf etdim».
Robbimiz barchamizga Sha'bon oyini munosib o'tkazishimizga yordam bersin va Ramazonga ham chiroyli, gunohlardan pok holatda etkazsin!
Manba:
«Hadis va Hayot» kitobi.
«Hijriy 1442» taqvim.
Hurshid Ma'ruf tayyorladi
Pol Kapur: «Bu yerda tarixni nafaqat ko‘rasiz, balki uni his qilasiz»
AQSH Davlat kotibining Janubiy va Markaziy Osiyo ishlari bo‘yicha yordamchisi Samir Pol Kapur O‘zbekistondagi Islom sivilizatsiyasi markaziga tashrif buyurdi, xabar bermoqda iccu.uz.
Islom sivilizatsiyasining ko‘p asrlik tarixi, uning ilm-fan, madaniyat va ma’rifat taraqqiyotiga qo‘shgan ulkan hissasi O‘zbekistondagi Islom sivilizatsiyasi markazi ekspozitsiyalarida yaxlit va ta’sirchan tarzda namoyon etilgan. Tashrif davomida Samir Pol Kapur islomgacha bo‘lgan davr sivilizatsiyalaridan tortib, Yangi O‘zbekiston davriga qadar bo‘lgan tarixiy jarayonlarni aks ettiruvchi galereyalar, buyuk allomalarning ilmiy-ma’rifiy merosi, noyob qo‘lyozmalar, muqaddas yodgorliklar hamda zamonaviy raqamli texnologiyalar asosida yaratilgan interaktiv ekspozitsiyalar bilan yaqindan tanishdi.
Mehmon ekspozitsiyalarning mazmunan izchilligi va tarixiy jarayonlarni bir-biri bilan uzviy bog‘liq holda namoyon etish usuliga alohida e’tibor qaratdi. Uning qayd etishicha, bu yerda muzey eksponatlari orqali o‘tmish haqida ma’lumot olish bilan cheklanib qolmay, tarixiy davrlar ruhini his qilish, ular o‘rtasidagi bog‘liqlikni anglash imkoni ham mavjud.
Samir Pol Kapur o‘z taassurotlarini quyidagicha ifodaladi:
«Bu muhtasham maskan. Islom tarixi va madaniyatining asrlar davomidagi taraqqiyoti bilan yaqindan tanishish men uchun unutilmas tajriba bo‘ldi. Bu yerda tarixni shunchaki kitob sahifalari orqali emas, balki o‘z ko‘zingiz bilan ko‘rasiz, uni his qilasiz va go‘yo o‘sha davrlarning ichida bo‘lasiz. Shu bois ushbu noyob maskanni barpo etishga hissa qo‘shgan barcha insonlarga samimiy minnatdorchilik bildiraman.
Yoshlarga ham bu yerga kelishni albatta tavsiya qilaman. Chunki bu maskan nafaqat tarixni o‘rganish, balki o‘tmish bilan kelajak o‘rtasidagi uzviy bog‘liqlikni anglash imkonini beradi. Men uchun eng esda qolarli lahzalardan biri Qur’oni karimga bag‘ishlangan golografik namoyish bo‘ldi. U menda katta taassurot va hayajon uyg‘otdi.
Menimcha, bu dargoh islom sivilizatsiyasining jahon tamadduniga qo‘shgan ulkan hissasini butun dunyoga namoyon etishga xizmat qiladi. Shuning uchun har bir inson bu yerga tashrif buyurib, ana shu boy va bebaho meros bilan shaxsan tanishishi lozim».
Pol Kapurning fikricha, Markazning ahamiyati uning tarixiy merosni namoyon etish bilangina cheklanmaydi. Ushbu maskan yosh avlod uchun o‘tmish saboqlarini anglash, ilm-fan va ma’rifatning sivilizatsiya taraqqiyotidagi o‘rnini his etish, milliy va umuminsoniy qadriyatlarga hurmat ruhini shakllantirish uchun ham muhim ma’naviy-ma’rifiy maydon vazifasini o‘taydi.
Tashrif yakunida AQSH Davlat kotibining Janubiy va Markaziy Osiyo ishlari bo‘yicha yordamchisi Samir Pol Kapur Islom sivilizatsiyasi markazidan olgan taassurotlari yuksak ekanini qayd etib, ushbu maskan boy tarixiy merosni zamonaviy muzey texnologiyalari va ta’sirchan taqdimot usullari orqali jahon jamoatchiligiga yetkazishda muhim ahamiyat kasb etishini ta’kidladi.
O‘zbekiston musulmonlari idorasi Matbuot xizmati
