Habar berganimizdek, bugun, 15 mart kuni Samarqand shahrida bo'lib o'tayotgan “Imom Buxoriy merosining o'ziga xos xususiyatlari va bugungi kundagi tarbiyaviy ahamiyati” mavzusidagi xalqaro anjumanda O'zbekiston, Afg'oniston va Tojikistondagi mahalliy hokimlar, diniy soha rahbarlari, etuk ulamolar, mutaxassis va mutasaddi vakillar ishtirok etmoqda.

Ushbu xalqaro anjuman kirish qismida Samarqand viloyati hokimi Erkinjon Turdimov so'zga chiqib, mehmonlarni viloyatga tashrifi bilan qutlab, ushbu xalqaro anjumanning o'tkazilishi faxr-iftixor bag'ishlashi, hozirda Imom Buxoriy yodgorlik majmuasida bunyodkorlik ishlari olib borilayotgani, buyuk muhaddis vatandoshimizning asarlari tadqiq etilayotgani to'g'risida ma'lumot berdi.

Shundan so'ng Din ishlari bo'yicha qo'mita raisi Abdug'ofur Ahmedov so'z olib, O'zbekistonda azaldan turli dinlarga e'tiqod qiluvchi xalqlar tinch-totuv yashab kelgani, O'zbekistonda fuqarolarning vijdon va diniy erkinligi sohasidagi konstitutsion huquqlarini ta'minlanlangani, tinchlik-osoyishtalik hukm surayotgani, so'nggi 4 yilda mamlakatimizda diniy-ma'rifiy sohada ham ulkan o'zgarish va islohotlar amalga oshirilgani haqidaaytib o'tdi.

Afg'oniston Islom Respublikasi Irshod, haj va vaqf ishlari vaziri Muhammad Qosim Halimiy o'z so'zida O'zbekistonda amalga oshirilayotgan xayrli ishlardan mamnun ekanini bildirib, Imom Buxoriy Islom dini yo'lida juda katta ishlarni amalga oshirganlarini alohida qayd etdi. Afg'onistonda mo'min-musulmonlarga yaratilgan sharoitlar haqida gapirib berdi.

Tojikiston Respublikasi Islom markazi raisi Saidmukarram Abdulqodirzoda xalqaro tadbir uchun minnatdorlik bildirib, Imom Buxoriyga oid anjuman tashkil etilgani, mintaqamizdan chiqqan alomalarni o'rganish va qardosh xalqlar o'rtasida munosabatlarni tiklash juda ajoyib ish bo'lganini ta'kidladi.

Shu bilan xalqaro anjumanning asosiy qismi boshlandi. Unda qardosh xalqlar ulamolarining mavzuga doir ta'sirli ma'ruzalari ishtirokchilarda katta taassurot qoldirmoqda.

Halqaro anjuman tafsilotlarini saytimiz va ijtimoiy tarmoqlarimiz orqali kuzatib boring.

O'zbekiston musulmonlari idorasi matbuot xizmati