Toshkentda milliy ommaviy axborot vositalari xodimlari uchun o'tkazilayotgan treningda Vashingtondan onlayn shaklda ma'ruza qilgan xalqaro konsul'tant, sobiq diplomat Temuri Yakkabashvili O'zbekistonning turizm salohiyatiga yuqori baho berdi, deb xabar bermoqda “Dunyo” AA.

Sobiq diplomat O'zbekistonda ulkan o'zgarishlar amalga oshirilayotgani, mamlakat dunyoga ochilayotganini ta'kidladi.

O'zbekistonning turizm va boshqa yo'nalishlardagi salohiyati nihoyatda yuksak. “Bu qo'hna zaminda qadimiy xalq yashaydi. Uning an'analari, qadriyatlari butun dunyoga namuna”, - dedi u.

Mamlakat hayotidagi yangilanishlar turizm sohasiga ham ijobiy ta'sir ko'rsatmoqda. Biroq, ma'ruzachining fikricha, hali qilinadigan ishlar ko'p.

Hususan, sayyohlar e'tiborini jalb qiladigan yangi g'oya va takliflar kerak. Mehmonlar uchun ikki va uch yulduzli mehmonxonalar tizimini kengaytirish, O'zbekistonning o'ziga xos sayyohlik salohiyatini keng targ'ib qilib, undan samarali foydalanishda ilg'or uslublardan foydalanish zarur.

Transport xizmati sifati va narxlari ham alohida ahamiyatga ega. Temuri Yakkabashvili ommaviy axborot vositalari vakillarini ushbu jarayonda faol qatnashishga chaqirdi.

Eslatib o'tamiz, 10-13 mart kunlari Toshkentda AQSh Global media agentligi (U.S. Agency for Global Media) bilan hamkorlikda ommaviy axborot vositalari vakillari uchun to'rt kunlik trening o'tkazilmoqda.

O'zbekiston musulmonlari idorasi matbuot xizmati