O'zbekistonning YuNESKOdagi doimiy vakolatxonasi Moddiy merosni saqlash va ta'mirlash masalalarini o'rganish bo'yicha xalqaro markaz (ICCROM) bosh direktori Vebber Ndoro bilan onlayn muloqot o'tkazdi, deb xabar bermoqda «Dunyo» AA.

Vebber Ndoro O'zbekiston 7 mingdan ziyod tarixiy va me'moriy yodgorlikka ega mamlakat sifatida ICCROMga a'zo bo'lishdan manfaatdor bo'lishini ta'kidladi. Hususan, boy merosni xalqaro standartlarga muvofiq tarzda saqlash bo'yicha tajriba almashish va o'rganishda yangi imkoniyatlar yaratiladi. Respublikaning ICCROMga qo'shilishi, shuningdek, yodgorliklarni saqlash va targ'ib qilishda global hamda mintaqaviy jarayonlarda to'liq ishtirok etish samaradorligini oshirishi ta'kidlandi. Bu esa mamlakatning xalqaro maydondagi obro'sini yuksaltirishga xizmat qiladi.

ICCROM rahbari Prezident Shavkat Mirziyoevning 2021 yilda Hiva shahrida «Markaziy Osiyo dunyo tsivilizatsiyalari chorrahasida» xalqaro madaniy forumini o'tkazish tashabbusini yuqori baholadi. Anjuman Markaziy Osiyo davlatlarining madaniyat, ilm-fan va boshqa sohalarni rivojlantirishga qo'shgan salmoqli hissasini taqdim etish va o'rganish uchun yana bir qulay imkoniyat bo'ladi. U xalqaro tadbirni yuqori darajada o'tkazish uchun har tomonlama yordam ko'rsatishga tayyorligini bildirdi.

Vebber Ndoro O'zbekiston rahbariyatining taniqli xalqaro ekspertlar, jumladan, ICCROM mutaxassislarini jalb qilgan holda O'zbekistondagi jahon merosi ob'ektlarini saqlash va ta'mirlash bo'yicha xalqaro maslahat mexanizmini (HMM) yaratish bo'yicha tashabbusini to'la qo'llab-quvvatladi.

Ma'lumot uchun, ICCROM – ta'lim, ma'lumot tarqatish, tadqiqotlar olib borish, hamkorlik qilish va ommaviy kampaniyalar orqali dunyo madaniy merosini saqlash va ta'mirlash bilan shug'ullanadigan davlatlararo tashkilotdir. U YuNESKO Bosh konferentsiyasi tashabbusi bilan 1959 yilda tashkil etilgan, bosh qarorgohi Rim shahrida joylashgan va 137 mamlakatni birlashtirgan.

O'zbekiston musulmonlari idorasi matbuot xizmati