Malayziya Davlat teleradiokompaniyasi (Radio Televisyen Malaysia - RTM) ning "Fresh Brew" dasturi xodimlari tayyorlagan O'zbekiston haqida maxsus ko'rsatuvda mamlakatimiz elchisi Ravshan Usmanov Malayziya tomoshabinlarini O'zbekiston – Malayziya munosabatlari haqida ma'lumot berdi.

O'zbek diplomati epidemiologik vaziyat yaxshilangandan so'ng ikki davlat o'rtasida faol hamkorlik qayta tiklanishiga umid bildirdi. Jumladan, ziyorat turizmi istiqbolli sohalardan biri ekani, unga Malayziya jamoatchiligining qiziqishi kattaligiga urg'u qaratdi.
Ta'lim sohasi ham muhim ekani, xususan, Malayziyaning Janubi-Sharqiy Osiyodagi mintaqaviy ta'lim maskani ekanligi katta istiqbollar ochishi, bu erda 200 dan ortiq o'zbekistonlik talaba tahsil olayotgani va Respublikamizda Malayziyaning ikki oliy o'quv yurti filiallari ochilganini qayd etdi.

Ma'lumot uchun, "RTM" nafaqat Malayziyada, balki butun Janubi-Sharqiy Osiyodagi eng yirik davlat teleradiokompaniyasi hisoblanadi. U 36 ta radio va 3 ta telekanalni o'z ichiga oladi.

O'zbekiston musulmonlari idorasi matbuot xizmati