O'zbekiston tashqi ishlar vazirining o'rinbosari Furqat Sidiqov boshchiligidagi delegatsiya Eronga tashrif buyurib, Eron madaniy meros, hunarmandchilik va turizm vazirining o'rinbosari Muhammad Hasan Talebiyon bilan uchrashdi, deb xabar bermoqda «Dunyo» AA.

Muloqot chog'ida O'zbekiston va Eron qadimiy madaniyat, boy tarixiy meros va ulkan sayyohlik salohiyatiga ega davlatlar ekani, shuning uchun ham tomonlar ushbu sohalarda hamkorlikni har tomonlama rivojlantirishdan manfaatdorligi ta'kidlandi.

O'tgan yil 29 dekabr' kuni O'zbekiston Turizmni rivojlantirish davlat qo'mitasi va Eron turoperatorlari assotsiatsiyasi o'rtasida birinchi marta o'tkazilgan videoanjuman o'zaro munosabatlarning muhim imkoniyatlarini ochib berdi. Shuningdek, to'g'ridan-to'g'ri aloqalarni o'rnatish va o'zaro hamkorlik istiqbollarini bevosita muhokama qilish uchun asos bo'lib xizmat qildi.

Eronning «Zagros Airlines» va «Aseman Airlines» kompaniyalari «Tehron-Toshkent-Tehron», «Tehron-Buxoro-Tehron» va «Mashhad-Buxoro-Mashhad» yo'nalishlarida sayyohlik charter reyslarini amalga oshirish to'g'risidagi qarorni qabul qildi.

Uchrashuvda eronlik restavratsiya ishlari bo'yicha usta va mutaxassislardan iborat delegatsiyani O'zbekistonga tashrifini uyushtirish va ushbu yo'nalishda treninglar o'tkazishga qiziqish bildirildi.

O'zbekiston musulmonlari idorasi matbuot xizmati