Zamonaviy geosiyosiy jarayonlar va islom omili
O'zbekiston Respublikasi Strategik tahlil va istiqbolni belgilash oliy maktabi kafedra mudiri Bahrom Ho'janov Toshkent islom instituti talabalari uchun “Zamonaviy geosiyosiy jarayonlar va islom omili” mavzusida ma'ruza qilib berdi.
Hozirgi zamonda xalqaro va geosiyosiy munosabatlar juda murakkab tus olgan. Geosiyosatni tushinish insoniyat va mamlakatlarning hamjihatlikda yashashi va xavfsizlik borasidagi choralarini ilmiy usulda rejalashtirishiga yordam beradi. Mutaxassislar, ijtimoiy-iqtisodiy, ekologik, demografik, axborot, diniy, madaniy saviyasiga ko'ra farqli mamlakatlar o'rtasidagi aloqalarni to'g'ri tahlil qilishi hamda mamlakatlarning o'zaro munosatlarini xolisona baholay olishi lozim.
Shuning uchun ham talabalar bilan o'tkaziladigan ilmiy suhbatlar siyosiy tafakkurni rivojlantirishda katta ahamiyat kasb etadi. Bu omil yurtimiz manfaati va kelajakdagi istiqbolli xalqaro rejalarni amalga oshirishda davlatlar siyosatidan boxabar bo'lishga sabab bo'ladi.
B.Ho'janov o'z ma'ruzasida islom olamida ro'y berayotgan geosiyosiy jarayonlar haqida zarur ma'lumotlar berdi. Bundan tashqari, musulmon mamlakatlarining siyosiy, iqtisodiy va harbiy salohiyatining yutuq va kamchiliklarini faktlar asosida tahlil qilib berdi. Mazkur ma'ruza talabalarda katta qiziqish uyg'otdi. Albatta, har bir ilmni o'z mutaxassisidan o'rganish juda muhim bo'lib, natijada katta manfaatlar xosil bo'ladi. Ilmiy uchrashuvlar yoshlar o'rtasida ko'proq o'tkazilishi kerak. Chunki, mana shunday suhbatlar ularning turli xil g'arazli g'oya va mafkuralardan asrashda birlamchi rol o'ynashi hech kimga sir emas.
Toshkent islom instituti
4-kurs talabasi Allaberganov Allabergan
Iordaniya OAV: Toshkentda Islom sivilizatsiyasiga bag‘ishlangan xalqaro mediaforum o‘tkaziladi
Iordaniyaning nufuzli “Jordan News Agency” (Petra) axborot agentligi hamda “Hala Ahbar” nashrida 24–29 avgust kunlari Toshkent shahrida bo‘lib o‘tadigan “Islom sivilizatsiyasi: yangi nigoh va kashfiyotlar” mavzusidagi xalqaro mediaforumga bag‘ishlangan maqolalar e’lon qilindi, deb xabar bermoqda “Dunyo” AA.
Agentlikda yozilishicha, mazkur yirik xalqaro tadbir O‘zbekistonning jahon media hamjamiyati bilan aloqalarini yanada kengaytirish, jurnalistlar va soha mutaxassislari o‘rtasida tajriba almashishni rivojlantirishi bilan ahamiyatlidir.
Shu bilan birga, forum davomida islom sivilizatsiyasining boy ilmiy-ma’rifiy va madaniy merosini zamonaviy media vositalari orqali keng targ‘ib etishga alohida e’tibor qaratiladi.
Forumning asosiy tadbirlari O‘zbekistondagi Islom sivilizatsiyasi markazida o‘tkaziladi. Unda xorijiy ommaviy axborot vositalari vakillari, xalqaro ekspertlar hamda media sohasi mutaxassislari ishtirok etadi.
Nashrlar forum dasturining mazmun-mohiyatiga alohida e’tibor qaratgan. Xususan, tadbir doirasida yalpi majlislar, ixtisoslashtirilgan media-ko‘rgazmalar, matbuot brifinglari va ikki tomonlama uchrashuvlar tashkil etiladi.
Munozaralarda hujjatli filmlar yaratish, tarixiy xotirani asrash va yoritish, nashriyot loyihalarini rivojlantirish, zamonaviy texnologiyalardan media sohasida samarali foydalanish hamda xalqaro media loyihalarni amalga oshirish istiqbollari muhokama qilinadi.
Nashrning qayd etishicha, tadbirning muhim jihatlaridan biri – O‘zbekistonlik talabalar uchun xalqaro media sohasining tajribali mutaxassislari ishtirokida amaliy master-klasslar o‘tkazilishidir. Bu mashg‘ulotlar zamonaviy jurnalistika, mediamahsulotlar yaratish va xalqaro axborot makonida samarali faoliyat yuritish bo‘yicha bilim va ko‘nikmalarni oshirishga xizmat qiladi.
Iordaniya OAVda forum doirasida ishtirokchilar uchun Samarqand shahriga safar ham rejalashtirilgani qayd etilgan. Xorijiy jurnalistlar Imom Buxoriy majmuasini ziyorat qilib, Samarqandning boy tarixiy-madaniy merosi bilan tanishadilar. Toshkent shahrida esa xalqaro OAV vakillari uchun maxsus mediatur tashkil etiladi.
Bunday safarlar forum ishtirokchilariga O‘zbekistonning nafaqat zamonaviy taraqqiyoti, balki uning jahon sivilizatsiyasi tarixidagi o‘rni, ilmiy-ma’rifiy an’analari va boy madaniy merosi haqida bevosita tasavvur hosil qilish imkonini beradi.
Maqolalarda xalqaro mediaforumning 28 avgust kuni yakuniy yalpi majlis va rasmiy yopilish marosimi bilan yakunlanishi ham ma’lum qilingan. Xorijiy mehmonlar O‘zbekiston Respublikasi davlat mustaqilligining 35 yilligiga bag‘ishlangan tadbirlarda ham ishtirok etadi.
O‘zbekiston musulmonlar idorasi Matbuot xizmati
