Indoneziya matbuoti O'zbekiston ijtimoiy-siyosiy hayotida ro'y berayotgan muhim voqealar haqida mamlakat jamoatchiligini xabardor qilishda davom etmoqda, deb xabar beradi “Dunyo” axborot agentligi.

"Mi’raj News Agency" axborot saytida yana bir maqola chop etildi. Unda ta'kidlanishicha, Hiva shahrida YuNYeSKO ko'magida "Markaziy Osiyo tsivilizatsiyalar chorrahasida" xalqaro forumi bo'lib o'tadi.

YuNYeSKOga tayanib Indoneziya axborot resursining xabar berishicha, forum mintaqaning umumiy madaniyati va umumiy merosini o'rganish va targ'ib qilish uchun yaxshi imkoniyat yaratadi.

O'zbekistonning Hiva shahri ming yillar davomida ta'lim, fan va madaniyat markazi, tsivilizatsiyalar beshigi vazifasini o'tagan Ipak yo'lidagi eng qadimiy shaharlardan biri, Ichan-qal'a ichki shahar esa 1990 yildan buyon YuNYeSKOning Jahon merosi ro'yxatiga kiritilgani alohida ta'kidlanadi.

"Shaharning Juma masjidi, maqbaralar, madrasalar, shuningdek, XIX asr boshlarida qurilgan saroylar kabi noyob me'moriy diqqatga sazovor joylari har yili dunyoning turli burchaklaridan sayyohlarni o'ziga jalb etadi", deb yozadi axborot resursi.

O'zbekiston musulmonlari idorasi matbuot xizmati