Ey Ko'kaldosh... (bo'lgan voqea)
Har safar otam Toshkentga kelganlarida, "O'g'lim, meni Chorsuga olib bor" deydilar. Mashinamga mindirib yo'lga otlanamiz. Chorsu bozoriga yaqinlashganda esa "Bolam sen ishlaringni qilaver, men Ko'kaldoshni yonida tushib qolaman" deb, yolg'iz aylanmoqchi bo'ladilar. Sababini so'rasam aytmaydilar.
Alhamdulillah o'tgan kuni yana Toshkentga keldilar. Kutganimdek Chorsuga olib borishimni so'radilar...
Yaqin qolganda, yana yolg'iz o'zlari tushib qoldilar. Bu gal qanday bo'lmasin bilib olaman deya, mashinani chetroqqa qo'yib ortlaridan sezdirmay kuzata boshladim.
Avval, Ho'ja Ahror Valiy masjidiga kirib namoz o'qidilar. So'ngra masjiddan tushib Ko'kaldosh madrasasining yon tomonidan devorlariga tikilib, nimalarnidir pichirlab, yurib borardilar.
Madrasaning darvozasiga kelganda biroz turib qoldilar. Men ham sezdirmasdan yaqinlashdim. Madrasa ichki hovlisiga kirib diqqat bilan tomosha qilib, aylanib chiqdilar va yana darvozadan chiqa turib qo'llarini duoga ochdilar, men esa nima deb duo qilayotganini eshitish uchun ortlaridan yaqinlashdim.
Otam esa duo qilardi: Allohim, bu madrasani, dining, Kaloming o'rgatiladigan maskanni to qiyomatgacha balo-qazolardan asragin, faoliyatiga xayr va baraka ber, minglab qorilar, olimlar chiqqan bu joydan yana Buxoriylar, Termiziylar, Shayx Muhammad Sodiqlar chiqishini nasib et. Bu dargohni, ustozlarini va talabalarini barakali qil, omin, Allohu akbar.
Duo qilib bo'lgach, madrasaga qarab ko'zlarida yosh bilan, ovozlari titragancha shunday dedilar: Ey ilmxona, ey olimlar beshigi, ey Ko'kaldosh! Aslida sen toshlardan qurilgan bitta imoratsan. Ammo, vazifang seni ulug' darajalarga etkazdi. Men seni yaxshi ko'raman, chunki bir vaqtlar senda o'qish menga armon bo'lgan... Lekin, Allohga hamd bo'lsin-ki, qalbimga quvonch bo'lgan, ko'zimning nuri, farzandim-jigarbandim sening bag'ringda 4 yil ta'lim olib, Islomni, Qur'onni, fiqhni, shariatni o'rgandi. Bugun, imom bo'lib, minglab insonlarni ma'rifatga, to'g'ri yo'lga da'vat etyapti. Men sendan roziman, sen ham bizdan rozi bo'l...
(Otamning ko'zlaridan oqayotgan yosh yuragimni ezdi)
Sayyid Abror Umar
Saudiya Arabistonida o‘tkazilayotgan xalqaro Qur’on tanlovida 133 davlat vakillari ishtirok etmoqda
Qirol Abdulaziz nomidagi Qur’oni karimni yod olish, o‘qish va sharhlash bo‘yicha qirq oltinchi xalqaro tanlovning saralash bosqichi 7 avgust kuni Makka shahridagi musobaqalar o‘tkaziladigan joyda 133 davlatdan 334 nafar ishtirokchi (erkak va ayollar) ishtirokida boshlandi.
IQNA "Minbar" gazetasiga tayanib xabar berishicha, Qirol Abdulaziz nomidagi Qur’oni karimni yod olish, o‘qish va sharhlash bo‘yicha qirq oltinchi xalqaro tanlovning saralash bosqichi bir kun avval Makkadagi musobaqalar o‘tkaziladigan joyda boshlangan va final bosqichini Masjidul Haromda o‘tkazish uchun zamin tayyorlagan.
Saudiya Arabistoni Islom ishlari, da’vat va hidoyat vazirligi tomonidan tashkil etilgan ushbu tadbirning saralash bosqichida hakamlar hay’atlari eng yuqori aniqlik va shaffoflik standartlariga rioya qilgan holda, Qur’on tilovati uslublari va qoidalariga ixtisoslashgan taniqli xalqaro hakamlar guruhi nazorati ostida erkak va ayol ishtirokchilarning chiqishlarini tinglab, final bosqichiga kimlar o‘tishini aniqladi.
Tanlovning joriy bosqichi 133 mamlakatdan 334 nafar ishtirokchi (erkak va ayollar) ishtirokida o‘tkazilmoqda, ular besh toifa: "Shatibiya" usuli bo‘yicha yetti xil qiroat asosida Qur’oni Karimni to‘liq yodlash (qiroat va nazariy bilimlarni, shuningdek, tajvid qoidalarini a’lo darajada bajarish va rioya qilishni o‘z ichiga oladi); a’lo darajada ijro etish, tajvidga rioya qilish va so‘zlarni sharhlash bilan Qur’oni Karimni to‘liq yodlash; a’lo darajada ijro etish va tajvidga rioya qilish bilan Qur’oni Karimni to‘liq yodlash; a’lo darajada ijro etish va tajvidga rioya qilish bilan ketma-ket o‘n beshta juzni yodlash; a’lo darajada ijro etish va tajvidga rioya qilish bilan ketma-ket beshta juzni yodlash bo‘yicha bellashmoqda.
Vazirlik ushbu global qur’oniy tadbirning muvaffaqiyatini ta’minlash uchun elektron hakamlik tizimini joriy etish, ishtirokchilarni baholashda adolat va aniqlikni ta’minlash uchun tashkiliy va keng qamrovli platformani yaratish, shuningdek, ularga turli xil xizmatlarni taqdim etish kabi barcha imkoniyatlarini ishga solishda davom etadi.
Qirol Abdulaziz nomidagi xalqaro musobaqa dunyodagi eng yirik Qur’on musobaqalaridan biri hisoblanib, uning umumiy pul mukofotlari miqdori 10 million saudiya rialidan oshadi.
Mazkur musobaqada O‘zbekiston sharafini "Mir Arab" o‘rta maxsus islom ta’lim muassasasi, "Sayyid Muhiddin maxdum" o‘rta maxsus islom ta’lim muassasasi, Imom Buxoriy nomidagi Toshkent islom instituti hamda "Xadichai Kubro" qizlar o‘rta maxsus islom bilim yurti talabalari himoya qilishi haqida avval xabar berilgan edi.
O‘zbekiston musulmonlari idorasi Matbuot xizmati
