Toshkent davlat sharqshunoslik universiteti olimi, professor Shorustam Shomusarov Butunjahon arab tili ittifoqi Markaziy kengashi a'zoligiga Markaziy Osiyo mintaqasidan saylandi. Bu haqda O'zAga universitet matbuot xizmati ma'lum qildi.

O'zbek olimi Sh.Shomusarov Butunjahon arab tili ittifoqining Markaziy kengashi a'zoligiga Markaziy Osiyo mintaqasidan saylanishi va dunyoning eng kuchli 24 arabshunosi ro'yxatida turishi Toshkent sharqshunoslik maktabiga bo'lgan katta e'tirofdir.

Livan poytaxti Bayrut shahrida joylashgan Butunjahon arab tili ittifoqi 1988 yilda dunyodagi barcha mamlakatlar arab tili mutaxassislarini arab tilini barqaror rivojlantirish maqsadida Arab davlatlari ligasi tomonidan tashkil etilgan.

2020 yil 1 dekabrda Livanning Bayrut shahrida Ittifoqning 3-davra saylovlari bo'lib o'tdi. Dunyoning turli mintaqalaridan yangi a'zolar, shu jumladan, Markaziy kengashning yangi 24 a'zosi qatorida o'zbekistonlik olim Shorustam Shomusarov ham saylandi.

Ma'lumot o'rnida, O'zbekistonda arab va turk xalqlari og'zaki ijodini korporavistik o'rganish bo'yicha yangi maktab yaratayotgan olim, filologiya fanlari doktori, professor Sh.Shomusarov Toshkent davlat sharqshunoslik universitetining arab filologiyasi kafedrasi mudiri sifatida faoliyat yuritib kelmoqda. Uning monografiyalari va maqolalari Marokash, Misr, Saudiya Arabistoni, Qatar, Suriya, Rossiya, Ozarbayjon, Qozog'iston va boshqa davlatlarda nashr etilgan.