Ikki oy muddatda Imom Moturidiy yodgorlik majmuasini ziyorat markaziga aylantirish hamda atrofidagi 8 nafar buyuk ulamolarning qabrlarini tiklash va obodonlashtirish ishlari kontseptsiyasini, uni amalga oshirish bo'yicha “Yo'l xaritasi”ni ishlab chiqib, tasdiqlash uchun Vazirlar Mahkamasiga kiritiladi.
Bu topshiriq «O'zbekiston Respublikasida ichki va ziyorat turizmini yanada rivojlantirish chora-tadbirlari to'g'risida»gi Prezident farmoni bilan Samarqand viloyati hokimligi Vazirlar Mahkamasi huzuridagi Din ishlari bo'yicha qo'mita, Madaniyat vazirligi, Fanlar akademiyasi, Qurilish vazirligiga berilgan.
Ushbu farmonga ko'ra, Samarqand viloyati hokimligi Qo'mita, Vazirlar Mahkamasi huzuridagi Din ishlari bo'yicha qo'mita, Madaniyat vazirligi, Badiiy akademiya va Moliya vazirligi bilan birgalikda ikki oy muddatda Samarqand shahrida islom dini, mintaqadagi mavjud din namoyandalari merosi va moddiy madaniy meros ob'ektlarini aks ettiruvchi tematik xiyobonni yaratish bo'yicha Vazirlar Mahkamasiga taklif kiritishadi.
Shuningdek Buxoro viloyati hokimligi Vazirlar Mahkamasi huzuridagi Din ishlari bo'yicha qo'mita, Madaniyat vazirligi va Moliya vazirligi bilan birgalikda ikki oy muddatda Buxoro shahrida islom dini tarixi va musulmon olamida mashhur bo'lgan shaxslar to'g'risida ma'lumot beruvchi innovatsion muzeyni qurish va uni rivojlantirish kontseptsiyasi bo'yicha takliflarni Vazirlar Mahkamasiga kiritish topshirilgan.

O'zbekiston musulmonlari idorasi matbuot xizmati