Men Bomdod nomazidan keyin Yosin surasini o'qishim bilan o'z o'zidan etim jimirlab yig'i keladi. Ushbu holatimni sababini aytib bersangiz.

JAVOB: Bismillahir rohmanir rohim. Qur'on tilovat qilganda yig'lash – bu xayrli holat. Payg'ambarimiz alayhissalom, sahobalar va salafi solihlarimizning tilovatdagi holatlari shunday edi. Alloh taolo solih mo'minlarning vasf etib shunday marhamat qiladi:
إِنَّمَا الْمُؤْمِنُونَ الَّذِينَ إِذَا ذُكِرَ اللَّهُ وَجِلَتْ قُلُوبُهُمْ وَإِذَا تُلِيَتْ عَلَيْهِمْ آيَاتُهُ زَادَتْهُمْ إِيمَانًا وَعَلَى رَبِّهِمْ يَتَوَكَّلُونَ
ya'ni: "Mo'minlar – Alloh zikr etilganida – dillarida qo'rquv bo'ladigan, oyatlari ularga tilovat qilinganida – imonlari ziyoda bo'ladigan, Parvardigorlarigagina (barcha ishlarida) tavakkul qiladiganlardir" (Anfol surasi, 2-oyat).
Demak, Alloh taoloning nomi zikr qilinganida va Qur'on tilovat qilinganida haqiqiy mo'minning dili eriydi, qalbi qo'rquvga tushadi va ko'zlariga yosh keladi. Toshbag'irlik va Allohning amriga itoatsizlik fosiqlarning xulqlaridandir.
Boshqa bir oyatda:
وَيَخِرُّونَ لِلْأَذْقَانِ يَبْكُونَ وَيَزِيدُهُمْ خُشُوعًا (الإسرا-109)
ya'ni: “Ular yig'lagan hollarida yuzlari bilan yiqilurlar va bu (Qur'on) ularning xushu'-xokisorliklarini ziyoda qilur” (Al-isro surasi, 109-oyat), deyilgan.
Siz Alloh taoloning Kalomini tilovat qilishda bardavom bo'ling. Tilovat asnosida qalbingiz erib, yig'i kelsa, bunga muvaffaq etgan Alloh taologa hamd ayting.
Alloh taolo barchamizni O'zining Kalomini xushu' bilan tilovat qiladigan bandalaridan qilsin. Vallohu a'lam.

O'zbekiston musulmonlari idorasi
Fatvo hay'ati.

@diniysavollar